ლევან ნიკოლეიშვილი გიორგი ბარამიძის განცხადებაზე: პირდაპირ არის გამიზნული სახელმწიფოს წინააღმდეგ ქმედებად, რომ გამოიყვანოს საქართველო ისეთ სახელმწიფოდ, რომლისთვისაც არავითარი კანონები არ არსებობს

პირდაპირ არის გამიზნული სახელმწიფოს წინააღმდეგ ქმედებად, რომ გამოიყვანოს საქართველო ისეთ სახელმწიფოდ, რომლისთვისაც არავითარი კანონები არ არსებობს, - განაცხადა გადაცემაში „იმედის კვირა“ „ერთიანი ნეიტრალური საქართველოს“ გენერალურმა მდივანმა, გენერალური შტაბის ყოფილმა უფროსმა ლევან ნიკოლეიშვილმა გიორგი ბარამიძის განცხადების შეფასებისას.

მისივე თქმით, ეს არ იყო უბრალოდ წამოროშვა, ეს იყო დაგეგმილი შეკვეთა, რომელიც უბრალოდ შესრულდა გიორგი ბარამიძის მიერ იმისთვის, რომ ის დავალება, რაც მან მიიღო, შეესრულებინა უმაღლეს დონეზე.

„ამას ჰქონდა გამიზნული აზრი, გეგმა და ასევე გამიზნული შედეგიც, თუ რა მოჰყვებოდა. მათ ეს იცოდნენ. უკვე ცდილობენ ამ ყველაფრის პოლიტიკური სარჩულით შეფუთვას და უკვე მნიშვნელობა აღარ აქვს იმ ამორალურ ქმედებას და იმ ნაღმს, რაც ბარამიძეს ეჭირა ხელში. მთავარი არის ის, რომ რამენაირად უკვე გაამართლონ ის ქმედება და ავიწყდებათ ყველაზე მთავარი, რომ თვითონაც თანამონაწილეები ხდებიან ბარამიძის ამ ქმედების“, - აღნიშნა ნიკოლეიშვილმა.

სამშობლოს ღალატის ბრალდებით დაკავებულ გიორგი ბარამიძეს 2-დან 4 წლამდე პატიმრობა ემუქრება. მის წინააღმდეგ გამოძიება ომის ვეტერანების მიმართვის საფუძველზე დაიწყო. ბარამიძემ, იაგო ხვიჩიას გადაცემაში, ქართველ სამხედროებს აფხაზეთის კონფლიქტისას ტყვეების დახვრეტა დააბრალა.