ლევილში ქართველთა მამულის მმართველი საბჭოს გაფართოებული სხდომა გაიმართა
ლევილის ქართველთა მამულში მმართველი საბჭოს გაფართოებულ სხდომას საქართველოს კულტურის მინისტრი და მმართველი საბჭოს თავმჯდომარე მაია ბითაძე ხელმძღვანელობდა.
სხდომაზე განხილული იყო ლევილის მამულის რეაბილიტაციის, მართვის, განვითარების და სამომავლო საქმიანობის მნიშვნელოვანი საკითხები.
მმართველი საბჭო წარმოადგენს სათათბირო ორგანოს, რომლის მიზანია ლევილის მამულის განვითარებასთან და ფუნქციონირებასთან დაკავშირებული საკითხების განხილვა და შესაბამისი გადაწყვეტილებების მიღების პროცესში მონაწილეობა.
სხდომის გახსნისას, მაია ბითაძემ ხაზი გაუსვა მმართველი საბჭოს მნიშვნელობას ლევილის მამულის საქართველოსთვის გადმოცემის შემდეგ მისი ეფექტიანი მართვისა და განვითარების პროცესში.
„ლევილის მამული არის განსაკუთრებული ისტორიული და ეროვნული მნიშვნელობის ადგილი. შესაბამისად, ჩვენი პასუხისმგებლობა მხოლოდ მისი რეაბილიტაციით არ სრულდება. მნიშვნელოვანია, რომ მმართველი საბჭოს ფარგლებში ჩამოვაყალიბოთ მამულის ფუნქციონირების მკაფიო ხედვა და უზრუნველვყოთ მისი მდგრადი განვითარება.
დღეს ჩვენ სწორედ ამ პროცესის მნიშვნელოვან ეტაპზე ვიმყოფებით. საბჭოს წევრებთან ერთად განვიხილეთ უკვე განხორციელებული სამუშაოები, არსებული მდგომარეობა და ის საკითხები, რომლებიც ლევილის მამულის მომავალ ფუნქციონირებას უკავშირდება“, – განაცხადა მაია ბითაძემ.
სხდომაზე წარმოდგენილი იყო ლევილის ქართველთა მამულში განხორციელებული სამუშაოების შესახებ პრეზენტაცია. პროექტის ფრანგმა იურისტმა ალექსანდრე დიელმა სანოტარო აქტით განსაზღვრული სახელმწიფო ვალდებულებების შესრულებასთან დაკავშირებით სამართლებრივი შეფასება წარმოადგინა.
მმართველი საბჭოს წევრებმა დაათვალიერეს მამულის ტერიტორია და განხორციელებულ სამუშაოებს ადგილზე გაეცნენ.
საბჭოს წევრებმა, ლევილის მამულის საქართველოსთვის გადმოცემის სანოტარო აქტის ხელმომწერი ოჯახების წარმომადგენლებმა, ირენ ციციშვილმა და ტიერი ბერიშვილმა, ასევე საბჭოს წევრმა, სამსონ ფირცხალავას ოჯახის შთამომავალმა და წარმომადგენელმა გიორგი რურუამ სხდომაზე მამულის რეაბილიტაციასთან დაკავშირებით მოსაზრებები და გარკვეული მიმართულებით საკუთარი რეკომენდაციები გამოთქვეს.
ლევილის მამულის მმართველი საბჭოს სხდომას ესწრებოდნენ საბჭოს წევრები: მაია ბითაძე – კულტურის მინისტრი, მმართველი საბჭოს თავმჯდომარე; მიხეილ კიკნაძე – კულტურის მინისტრის პირველი მოადგილე; გიორგი კაკაურიძე – ფინანსთა მინისტრის პირველი მოადგილე; ნინო ენუქიძე – ეკონომიკისა და მდგრადი განვითარების მინისტრის პირველი მოადგილე; ირაკლი შენგელია – სსიპ სახელმწიფო ქონების ეროვნული სააგენტოს თავმჯდომარე; ირენ ციციშვილი – ლევილის მამულის საქართველოსთვის გადმოცემის სანოტარო აქტის ხელმომწერი ოჯახების წარმომადგენელი; ტიერი ბერიშვილი – ლევილის მამულის საქართველოსთვის გადმოცემის სანოტარო აქტის ხელმომწერი ოჯახების წარმომადგენელი; ასინეთ კალატოზიშვილი – საფრანგეთში მცხოვრები ქართული დიასპორის წარმომადგენელი; შორენა ციცაგი – კულტურის სამინისტროს საერთაშორისო ურთიერთობების დეპარტამენტის საერთაშორისო ურთიერთობების სამმართველოს უფროსი; გიორგი რურუა – სამსონ ფირცხალავას ოჯახის შთამომავალი/წარმომადგენელი; მარიამ გორდაძე – მმართველი საბჭოს მდივანი. სხდომას ასევე ესწრებოდნენ საფრანგეთის რესპუბლიკაში საქართველოს საგანგებო და სრულუფლებიანი ელჩი, იუნესკოში საქართველოს მუდმივი წარმომადგენელი ირაკლი ყურაშვილი და ლევილ-სიურ-ორჟის მერი ერიკ ბრევი.
26 სექტემბერს ლევილის ქართველთა მამულში სარეაბილიტაციო სამუშაოების დასრულება საზეიმოდ აღინიშნება.
ინფორმაციას კულტურის სამინისტრო ავრცელებს.
იმედი
წყარო: imedinews.ge