ლიეტუვის პრეზიდენტი: ევროპაში დრონებთან დაკავშირებული ინციდენტები შესაძლოა რუსეთის უფრო ფართო ტაქტიკის ნაწილი იყოს - მოსკოვი შესაძლოა ცდილობდეს ზეწოლა მოახდინოს იმ ქვეყნებზე, რომლებიც აქტიურად უჭერენ მხარს უკრაინას, ნატოსთან ღია კონფრონტაციაში შესვლის გარეშე

ლიეტუვის პრეზიდენტმა, გიტანას ნაუსედამ განაცხადა, რომ ევროპაში დრონებთან დაკავშირებული ინციდენტები შესაძლოა რუსეთის უფრო ფართო ტაქტიკის ნაწილი იყოს.

მისი თქმით, მოსკოვი შესაძლოა ცდილობდეს ზეწოლა მოახდინოს იმ ქვეყნებზე, რომლებიც აქტიურად უჭერენ მხარს უკრაინას, ნატოსთან ღია კონფრონტაციაში შესვლის გარეშე.

ნაუსედამ აღნიშნა, რომ მსგავსი შემთხვევები შესაძლოა გაიზარდოს. მან ასევე ყურადღება გაამახვილა რუსეთის სულ უფრო აგრესიულ ქცევაზე.

„რუსეთის ქცევა სულ უფრო აგრესიული ხდება. ეს სულ უფრო მეტად მოწმობს გარკვეულ ტენდენციაზე. ნატოსთან პირდაპირ კონფრონტაციაში შესვლის სურვილის არქონის გამო, რუსეთი ცდილობს თავს დაესხას იმ ქვეყნებს, რომლებიც უკრაინის ყველაზე ერთგული მხარდამჭერები არიან“, - განაცხადა ლიეტუვის პრეზიდენტმა.

ნაუსედას თქმით, ევროპაში რუსულ უპილოტო საფრენ აპარატებთან დაკავშირებული თითოეული შემთხვევა აუცილებლად არ ნიშნავს ნატოზე პირდაპირ თავდასხმას.

მან ივარაუდა, რომ რუსეთმა შესაძლოა ცნობიერად დაუშვას დრონების გადახვევა დაგეგმილი მარშრუტიდან. ამ შემთხვევაში უპილოტო აპარატები შესაძლოა აღმოჩნდნენ არა მხოლოდ ლიეტუვის ტერიტორიაზე, არამედ ბალტიისპირეთის სხვა ქვეყნებსა თუ პოლონეთშიც.

„ისეთი ინციდენტები, როგორიცაა, მაგალითად, ახლახან ჩამოგდებული დრონი და სხვა დრონები, აუცილებლად არ წარმოადგენს რუსეთის პირდაპირ თავდასხმას ნატოს წინააღმდეგ“, - აღნიშნა ნაუსედამ.