მაკა ბოჭორიშვილი: გზავნილები გვესმის, რომ მხარს უჭერენ საქართველოს მოსახლეობის ევროპულ მისწრაფებებს და იმავდროულად, აშანტაჟებენ საქართველოს, იმავე მოსახლეობას და იმავე მოქალაქეებს უვიზო რეჟიმის შეჩერებით

გზავნილები გვესმის, რომ მხარს უჭერენ საქართველოს მოსახლეობის ევროპულ მისწრაფებებს და ა.შ. იმავდროულად, აშანტაჟებენ საქართველოს, იმავე მოსახლეობას და იმავე მოქალაქეებს უვიზო რეჟიმის შეჩერებით, - განაცხადა გადაცემაში „იმედი LIVE“ საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა.

კერძოდ, ჟურნალისტმა მას ჰკითხა, „განსაკუთრებით ევროკავშირის ელჩს უყვარს ხოლმე იმის თქმა, რომ ეს საკითხი დევს მაგიდაზე. განიხილება ეს საკითხი, მუდმივად გვახსენებენ ამას. წლის ბოლოსთვის თუ ველოდებით გააქტიურებას?“.

მინისტრის თქმით, „ნამდვილად, ეს საკითხი დევს მაგიდაზე და შანტაჟის მექანიზმად ჯერ კიდევ ვალიდურია, რომ გამოიყენებოდეს და გამოიყენება“.

„ეს, რა თქმა უნდა, მათ ხელშია, როდესაც უნდათ ამ მექანიზმს გამოიყენებენ. უბრალოდ, სამწუხაროა, რომ ასეთი დამოკიდებულება არსებობს ქართული საზოგადოების მიმართ ევროკავშირის მხრიდან მაშინ, როდესაც სულ სხვაგვარი გზავნილები გვესმის, რომ ისინი მხარს უჭერენ საქართველოს მოსახლეობის ევროპულ მისწრაფებებს და ა.შ. იმავდროულად, აშანტაჟებენ საქართველოს, იმავე მოსახლეობას და იმავე მოქალაქეებს უვიზო რეჟიმის შეჩერებით.

კიდევ ერთხელ, არაერთხელ მითქვამს, რომ ნაკლებად სავარაუდოა. ეს არის შანტაჟის საკმაოდ ეფექტიანი მექანიზმი, მოდით ასე ვთქვათ, ხალხს, საზოგადოების ნაწილს ამით გარკვეულწილად ანერვიულებენ. თუმცა, არ მგონია, რომ ამას, თუნდაც გამოიყენონ ეს მექანიზმი, ის შედეგი ჰქონდეს, რისთვისაც სურთ. ჩვენმა საზოგადოებამ აჩვენა საკმაოდ მტკიცე პოზიცია. ძალიან ბევრი რამ გამოვიარეთ, ძალიან ბევრი ზეწოლა იყო გამოყენებული ჩვენს საზოგადოებაზე იმისთვის, რომ გავლენა მოეხდინათ ჩვენი საზოგადოების პოზიციებზე. ვფიქრობ, საქართველომ, ქართულმა საზოგადოებამ თავისი სათქმელი თქვა“, - აღნიშნა მინისტრმა.