მაკა ბოჭორიშვილი: რიგ წევრ ქვეყნებში ეს პოზიცია აქტიურად ფიქსირდება, რომ ისინი არ ემხრობიან ბრიუსელის „გაბუტულობის პოლიტიკას“, თუმცა ბრიუსელს უჭირს დიალოგის დაწყება, არიან ქვეყნები, რომლებიც ცდილობენ წინაპირობები დააყენონ დიალოგის განახლებისთვის

მიდგომები საქართველოსთან დაკავშირებით შეცვლილია, რიგ წევრ ქვეყნებში ეს პოზიცია აქტიურად ფიქსირდება, რომ ისინი არ ემხრობიან ბრიუსელის „გაბუტულობის პოლიტიკას“, თუმცა ბრიუსელს უჭირს დიალოგის დაწყება, არიან ქვეყნები, რომლებიც ცდილობენ წინაპირობები დააყენონ დიალოგის განახლებისთვის, რაც სრულიად მიუღებელია, - განაცხადა გადაცემაში „იმედი Live” საქართველოს საგარეო საქმეთა მინისტრმა მაკა ბოჭორიშვილმა.

ვიცე-პრემიერის განცხადებით, ბრიუსელს კანონებთან დაკავშირებით საქართველოსთან დიალოგში შესვლა უჭირს.

„არგუმენტების სისუსტე ფაქტია, ფაქტია რომ ევროკავშირს უჭირს თუნდაც დიალოგში შემოსვლა, თუნდაც კანონებთან დაკავშირებით. 2 წლის განმავლობაში ხომ შესაძლებელი იყო, თუ კი არსებობდა სურვილი პოლიტიკური დიალოგის, მოძებნილიყო რაღაც პლატფორმა, თუ პრობლემას კანონი წარმოადგენს ერთი შეხვედრა, დისკუსია შემდგარიყო და მოგვესმინა ვინმესგან თუ რა ნაწილში არის ეს კანონი მიუღებელი“, - განაცხადა მაკა ბოჭორიშვილმა.

საგარეო საქმეთა მინისტრი საფრანგეთის პრეზიდენტის იმ განცხადებასაც გამოეხმაურა. მაკრონმა განაცხადა, რომ აშშ-ს გადასაწყვეტი არ არის, რა კანონები ექნებათ ევროპელებსა და ფრანგებს.

„თუ საფრანგეთისთვის მიუღებელია, რომ მეორე ან მესამე ქვეყანამ უკარნახოს რა კანონი მიიღოს, ნებისმიერი ქვეყნისთვის იგივე პრინციპი მოქმედებს. ჩვენი საკანონმდებლო ორგანო მუშაობს და იღებს კანონებს ჩვენი ევრონული ინტერესების შესაბამისად. ამას ნამდვილად უნდა ვცეთ პატივი“, - აღნიშნა ვიცე-პრემიერმა.