მამა საბა გაზდელიანი: ყველაზე მძიმეა ის ფაქტი, როდესაც საზოგადოებისთვის ცნობილი ადამიანები ასე საჯაროდ და ღიად შეურაცხყოფას აყენებენ რომელიმე ადამიანს, ან წმინდანს, ან ეკლესიას

ნაცვლად იმისა, პოპულარობა კეთილი მიზნებისთვის გამოიყენონ, ბოროტული მიზნებისთვის იყენებენ და საზოგადოებაში ღვარძლს თესავენ, - განუცხადა „ქრონიკას“ მამა საბა გაზდელიანმა.

სასულიერო პირი ონისე ოქრიაშვილის მიერ ერთ-ერთ იუმორისტულ გადაცემაში წმინდა წინასწარმეტყველი იონას შეურაცხმყოფელი ფორმით მოხსენიებას გამოეხმაურა.

„ყველაზე მძიმეა ის ფაქტი, როდესაც საზოგადოებისთვის ცნობილი ადამიანები ასე საჯაროდ და ღიად შეურაცხყოფას აყენებენ რომელიმე ადამიანს, ან წმინდანს, ან ეკლესიას. ნაცვლად იმისა, პოპულარობა კეთილი მიზნებისთვის გამოიყენონ, ბოროტული მიზნებისთვის იყენებენ და საზოგადოებაში ღვარძლს თესავენ. უნდა გვახსოვდეს, რომ ღირებულებები, რაც დღეს გაგვაჩნია, არის მოპოვებული და დამტკიცებული უდიდესი შრომით, ოფლითა და სისხლით, რომელიც გაწია ეკლესიამ, წინაპრებმა. ამ ფასეულობების ერთი ხელის მოსმით უგულებელყოფა, მათი დაცინვა, გაშარჟება, ძალიან დიდი დანაშაულია როგორც ჩვენი წინაპრების, ისე მომავალი თაობების მიმართ, რადგან იუმორი არ შეიძლება იყოს სხვისი შეურაცხყოფა“, - აღნიშნა სასულიერო პირმა.

ოპოზიციის აქტივისტ ონისე ოქრიაშვილს, რომელიც ერთ-ერთ პოდკასტში მწერალ ნოდარ დუმბაძის მისამართით სიძულვილის ენას იყენებს, ფიზიკურად გაუსწორდნენ.

პროკურატურამ ონისე ოქრიაშვილის მიმართ ჩადენილი ძალადობის ფაქტზე დაკავებულს ბრალდება წარუდგინა.