მარგუს ცაჰკნა: რუსეთი ომს აწარმოებს არა მხოლოდ რაკეტებით, არამედ ნარატივებითაც - მულტფილმი „მაშა და დათვი“ კრემლის „რბილი ძალის“ ნაწილია, რომელიც საბავშვო გასართობ კონტენტში ნერგავს პროკრემლისტურ და მილიტარისტულ გზავნილებს

ესტონეთის საგარეო საქმეთა მინისტრი, მარგუს ცაჰკნა გამოეხმაურა ინფორმაციას იმის შესახებ, რომ Netflix-მა შეიძინა რუსული ანიმაციური სერიალის, „მაშა და დათვის“ კიდევ ორი სეზონის ჩვენების უფლება, ასევე გაახანგრძლივა ლიცენზია წინა სეზონებსა და სპინ-ოფებზე.

„რუსეთი ომს აწარმოებს არა მხოლოდ რაკეტებით, არამედ ნარატივებითაც. მულტფილმი „მაშა და დათვი“ კრემლის „რბილი ძალის“ ნაწილია, რომელიც საბავშვო გასართობ კონტენტში ნერგავს პროკრემლისტურ და მილიტარისტულ გზავნილებს და, ამავდროულად, ახდენს რუსული აგრესიისა და იმპერიული ამბიციების ნორმალიზებას“, - დაწერა ცაჰკნამ სოციალურ ქსელ X-ში.

„მსოფლიო არასდროს შეეგუებოდა საბავშვო კონტენტს, რომელშიც ნაცისტური სიმბოლიკა დადებითადაა წარმოჩენილი. საბჭოთა სიმბოლიკა იმსახურებს ზუსტად ასეთივე მორალურ სიმკაცრეს შეფასებაში“, - დასძინა მან.

„ბევრი ხალხისთვის, მათ შორის ესტონელებისთვის, ეს სიმბოლიკა ოკუპაციას, მასობრივ მკვლელობებს, დეპორტაციებსა და კაცობრიობის წინააღმდეგ ჩადენილ დანაშაულებს განასახიერებს“, - დაასკვნა ესტონეთის საგარეო საქმეთა მინისტრმა.