მარიამ ლაშხი: ჩვენი მიზანია, მეტმა ახალგაზრდამ მიიღოს ხარისხიანი განათლება და საკუთარი ცოდნა და პროფესიული წარმატება ქვეყნის წინსვლას მოახმაროს

საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარემ, მარიამ ლაშხმა იმ ახალგაზრდებს, რომლებმაც წელს წარმატებით ჩააბარეს ერთიანი ეროვნული გამოცდები და პირველკურსელის სტატუსი მოიპოვეს, პარლამენტის პლენარულ სხდომაზე სასწავლო წლის დაწყება მიულოცა და ნაყოფიერი სტუდენტური წლები უსურვა.

„დღეს ჩვენი გუნდი დიდი გამოწვევის წინაშე დგას - განათლების სისტემური რეფორმა, რომლის მიზანი უფრო ხარისხიანი, ხელმისაწვდომი და სტუდენტზე ორიენტირებული უმაღლესი განათლების სისტემის შექმნაა. ეს არ არის უბრალო ადმინისტრაციული ცვლილება. ეს ჩვენი პასუხისმგებლობაა მომავალი თაობისა და ქვეყნის წინაშე.

კარგად მომზადებული პროფესიონალების აღზრდა ის ფუნდამენტია, რაზეც სახელმწიფო დგას. სწორედ ამიტომ, სრული პასუხისმგებლობით, სიფრთხილითა და პროფესიონალთა ჩართულობით ვუდგებით ამ რეფორმას. გვესმის, რისი შეცვლაა გადაუდებელი და რისი - არა. თუ არ ვიცით, რა უნდა დარჩეს უცვლელი, დავკარგავთ საყრდენს და ინდივიდუალობას; თუ არ გავითვალისწინეთ, რა საჭიროებს ცვლილებას, დავკარგავთ განვითარების პერსპექტივას.

ამ მასშტაბის ცვლილება მხოლოდ ახალი წესების შემოღებას არ გულისხმობს. მას მუდმივი დაკვირვება და, საჭიროებისამებრ, რეაგირება სჭირდება, რაც ერთადერთ მიზანს ემსახურება: რაც შეიძლება მეტმა ადამიანმა მიიღოს ხარისხიანი განათლება“, - განაცხადა მარიამ ლაშხმა.

განათლების, მეცნიერებისა და ახალგაზრდულ საქმეთა კომიტეტის თავმჯდომარის თქმით, ამის ნათელი გამოხატულება პრემიერ-მინისტრის ინიციატივით მიღებული ე.წ. მეორადი ჩარიცხვის შესაძლებლობის შესახებ გადაწყვეტილებაა, რომელიც მინიმალური კომპეტენციის ზღვარგადალახულ 1795 აბიტურიენტს საშუალებას აძლევს, დარჩენილ ვაკანტურ ადგილებზე კიდევ ერთხელ აირჩიონ პროგრამა და უნივერსიტეტი.

„ყოველწლიურად გვყავს აბიტურიენტები, რომლებიც მინიმალურ ზღვარს გადალახავენ, თუმცა, კონკურენციის პირობებში, სასურველ პროგრამაზე ვერ ხვდებიან. ეს აკადემიური კონკურენციის ბუნებრივი და სამართლიანი წესია. მაგრამ წლევანდელი ვითარება განსაკუთრებულია: ქვეყანა იმყოფება უმაღლესი განათლების რეფორმის პირველ, გარდამავალ ეტაპზე. შეიცვალა პროგრამების განაწილების პრინციპები და შეიქმნა ახალი შესაძლებლობები, რის გამოც, ბუნებრივია, ზოგიერთმა აბიტურიენტმა არჩევანის გადააზრება მოისურვა. ჩვენი პასუხი ამ სიტუაციაზე მთლიანად ახალგაზრდაზეა ორიენტირებული. ვუსმენთ მშობლებს, მასწავლებლებს, მოსწავლეებს, სტუდენტებს და ვმოქმედებთ მათი საუკეთესო ინტერესებიდან გამომდინარე. გამონაკლისის დაშვება არ არის სისუსტე. ეს ჩვენი გუნდის სიძლიერის მტკიცებულებაა იმ ხალხის წინაშე, ვინც გვენდობა.

ამავე ხედვას ეფუძნება კიდევ ერთი მნიშვნელოვანი გადაწყვეტილება - მიმდინარე წელს სახელმწიფო უნივერსიტეტებში ჩარიცხული თითოეული სტუდენტის სწავლის სრული სახელმწიფო დაფინანსება. ჩვენი მიზანია, მეტმა ახალგაზრდამ მიიღოს ხარისხიანი განათლება და საკუთარი ცოდნა და პროფესიული წარმატება ქვეყნის წინსვლას მოახმაროს - სწორედ ამიტომ, ეს რეფორმა ინვესტიციაა საქართველოს მომავალში“, - აღნიშნა კომიტეტის თავმჯდომარემ.

მარიამ ლაშხის თქმით, პარალელურად ზოგადი განათლების სისტემის სრულყოფაზეც მიმდინარეობს მუშაობა. „2024 წელს მიღებული „ზოგადი განათლების ეროვნული მიზნების“ დოკუმენტი ქვეყნის სტრატეგიული არჩევანია, რათა განათლება დაეფუძნოს ჩვენი სახელმწიფოს ისტორიას, ენასა და კულტურას. პროფესიული განათლება სულ უფრო მნიშვნელოვან მიმართულებად იქცევა - 2026 წლის ერთიანი ეროვნული გამოცდების შედეგებით, პროფესიულ პროგრამებზე სწავლის გაგრძელების უფლება 3141-მა აბიტურიენტმა მოიპოვა. სასკოლო ფორმებზე მუშაობისასაც სახელმწიფომ განსაკუთრებული ყურადღება დაუთმო პროცესის მოწესრიგებულობასა და სამართლიან განაწილებას - მშობლებს არჩევანის სრული თავისუფლება მიეცათ, ერთადერთი პირობით, რომ დაცული იყოს დადგენილი დიზაინისა და ნაჭრის სტანდარტი.

განათლების რეფორმის მთავარი მიზანია ჩვენი შვილების აღზრდა ისეთი სულისკვეთებით, რომელიც პატივს სცემს ჩვენს ეროვნულ იდენტობას, ტრადიციებსა და ღირებულებებს, რომლებმაც საუკუნეების განმავლობაში შემოინახა ქართველი ერი. მადლობა განათლების, მეცნიერებისა და ახალგაზრდობის სამინისტროს აქტიური და დაუღალავი შრომისთვის. მნიშვნელოვანია, ეს რეფორმა იყოს სრულყოფილი, დაცული იყოს ჩვენი შვილების საუკეთესო ინტერესი და ჩვენს ქვეყანას ჰქონდეს ძლიერი ხერხემალი იმ ინტელექტუალური რესურსით, რომელიც საქართველოში არსებობს.

ჩვენს ახალგაზრდებს მინდა ვუთხრა: თქვენი მომავალი საქართველოს მომავალია. ჩვენ ვქმნით შესაძლებლობებს, რომლებიც ამ მომავალს კიდევ უფრო ძლიერს გახდის“, - განაცხადა მარიამ ლაშხმა.