მარკ კარნის განცხადებით, კანადა ამერიკის სამხედრო აგრესიის მოგერიების სცენარზე მუშაობდა

კანადის პრემიერმა New York Times-ს განუცხადა, რომ ოტავა ერთი წლის განმავლობაში ამერიკის სამხედრო აგრესიის მოგერიებისთვის ემზადებოდა. მარკ კარნის თქმით, ოტავა თავდაცვის რამდენიმე ვარიანტზე მუშაობდა იმ შემთხვევისთვის, თუ დონალდ ტრამპი კანადაში შეჭრის ბრძანებას გასცემდა.

პრემიერის განცხადებით, ტრამპის მუქარები კანადის „51-ე შტატად“ გადაქცევის შესახებ სერიოზულად აღიქვეს და მთავრობამ პოტენციური შეჭრის რისკები დეტალურად შეისწავლა.

„მიმაჩნია, რომ ასეთ თანამდებობებზე შენი მოვალეობაა მსგავსი სცენარების გათვლა. ეს უბრალოდ რისკების მართვაა“, - განაცხადა კარნიმ.

მან აღნიშნა, რომ აშშ-ის შეჭრა არ წარმოადგენს საბაზისო სცენარს, თუმცა ასეთი სიტუაციის დაშვების გარეშე მოქმედება „უპასუხისმგებლობა იქნებოდა“. მისი თქმით, ამგვარმა მზადყოფნამ ოტავას ვაშინგტონზე დამოკიდებულების შემცირებისკენ უბიძგა.