მარკო რუბიოს განცხადებით, ბრიტანეთში მდებარე სამხედრო ბაზაზე, რომელსაც ამერიკული ძალები იყენებენ, სავარაუდო ტერაქტის მცდელობის უკან „უცხოური ძალის ხელი“ იკვეთება

აშშ-ის სახელმწიფო მდივნის, მარკო რუბიოს განცხადებით, ბრიტანეთში მდებარე სამხედრო ბაზაზე, რომელსაც ამერიკული ძალები იყენებენ, სავარაუდო ტერაქტის მცდელობის უკან „უცხოური ძალის ხელი“ იკვეთება.

რუბიომ გამოძიების შესახებ იმაზე მეტი დეტალი გაასაჯაროვა, ვიდრე ბრიტანულმა მხარემ, რომელმაც ეჭვმიტანილების გირაოთი გათავისუფლების გამო პრეზიდენტ დონალდ ტრამპის კრიტიკაც დაიმსახურა.

„ის, რაც ამ უქმეებზე მოხდა, შესაძლოა ძალზედ სერიოზული საფრთხე ყოფილიყო და ასეც იყო“, - განაცხადა რუბიომ Fox News-ის ეთერში და დასძინა, რომ ამ თემაზე „კიდევ ბევრი სიახლე გახდება ცნობილი“.

„ამ საქმეში აშკარად იკვეთება უცხოური ძალის ხელი, თუმცა დეტალებში სიღრმისეულად ჯერ არ შევალ“, - აღნიშნა სახელმწიფო მდივანმა.

სამართალდამცველებმა კვირას დილით, დასავლეთ ინგლისში მდებარე ფეირფორდის სამხედრო ბაზასთან, საიდანაც ამერიკული B-1 ტიპის ბომბდამშენები ირანის წინააღმდეგ ოპერაციებს ახორციელებენ, ხუთი მამაკაცი დააკავეს.

თუმცა, ეჭვმიტანილები - 23-იდან 25 წლამდე ასაკის დიდი ბრიტანეთის მოქალაქეები ლონდონის რეგიონიდან - ორშაბათს გირაოს სანაცვლოდ გაათავისუფლეს. აღნიშნულმა გადაწყვეტილებამ აშშ-ის პრეზიდენტის, დონალდ ტრამპის უკმაყოფილება გამოიწვია, რომელმაც აღნიშნა: „მე ასე არ მოვიქცეოდი“.

ტრამპის თქმით, ეჭვმიტანილები „შესაძლოა“ ირანთან იყვნენ დაკავშირებულნი. „მე ვიცი პასუხი და შემიძლია კონკრეტულადაც ვთქვა, თუმცა მირჩევნია, ჯერ არ ვისაუბრო“, - განუცხადა აშშ-ის პრეზიდენტმა ოვალურ კაბინეტში შეკრებილ ჟურნალისტებს.