მასუდ პეზეშკიანი: თუ აშშ ივნისის შეთანხმებით ნაკისრ ვალდებულებებს შეასრულებს, თეირანი შემხვედრ ნაბიჯებს დაუყოვნებლივ გადაგამს
ირანი დაუყოვნებლივ გადადგამს შემხვედრ ნაბიჯს, თუ შეერთებული შტატები ივნისში გაფორმებული დროებითი შეთანხმებით ნაკისრ ვალდებულებებს შეასრულებს, განაცხადა ირანის პრეზიდენტმა მასუდ პეზეშკიანმა. ინფორმაციას Reuters-ი ავრცელებს.
სააგენტოს ცნობით, პეზეშკიანმა ამის შესახებ შანხაის თანამშრომლობის ორგანიზაციის სამიტზე, ბიშკეკში განაცხადა. ირანის პრეზიდენტის განცხადება მას შემდეგ გაკეთდა, რაც ივლისის ბოლოდან აშშ-ირანის კონფლიქტში მხარეებმა პირველად განახორციელეს პირდაპირი დარტყმები. შეერთებულმა შტატებმა ლარაკის კუნძულზე მიიტანა იერიში, ირანმა კი იორდანიაში მდებარე ორ ამერიკულ სამხედრო ბაზას შეუტია.
„მკაფიოდ ვაცხადებ, რომ თუ აშშ ურთიერთგაგების მემორანდუმით ნაკისრ ვალდებულებებს შეასრულებს, ირანის ისლამური რესპუბლიკა დაუყოვნებლივ გადადგამს საპასუხო ნაბიჯს“, - განაცხადა პეზეშკიანმა.
სააგენტოს ცნობით, ირანის პრეზიდენტი ივნისში თეირანსა და ვაშინგტონს შორის გაფორმებულ დროებით შეთანხმებას გულისხმობდა, რომლის მიზანიც ომის დასრულება იყო. კონფლიქტი 28 თებერვალს აშშ-ისა და ისრაელის მიერ ირანზე განხორციელებული დარტყმებით დაიწყო. შეთანხმება მისი შესრულების საკითხზე მხარეებს შორის უთანხმოების გამო მალევე დაირღვა.
თეირანი არაერთხელ აცხადებდა, რომ ჰორმუზის სრუტეში - გლობალური ნავთობის მიწოდებისთვის სასიცოცხლოდ მნიშვნელოვან საზღვაო გზაზე - თავისუფალ ნავიგაციას მხოლოდ იმ შემთხვევაში დაუშვებს, თუ ვაშინგტონი შეთანხმების პირობებს შეასრულებს.
პეზეშკიანის თქმით, ომი არცერთი მხარის ინტერესებში არ შედის და თეირანი ვაშინგტონთან კონფლიქტის დიპლომატიური გზით მოგვარებისთვის კვლავ მზად არის.
იმედი
წყარო: imedinews.ge