მერაბ ხოხობაია სახელმწიფო უნივერსიტეტებში უფასო სწავლებაზე: აღნიშნული მოდელი ეფუძნება ურთიერთპატივისცემას - სახელმწიფო იღებს პასუხისმგებლობას დაფინანსებასთან დაკავშირებით, ხოლო სტუდენტებს, ბუნებრივია, მოეთხოვებათ, რომ ისინი მაქსიმალურად ჩართულები იყვნენ სასწავლო პროცესში

მთლიანობაში აღნიშნული მოდელი ეფუძნება ურთიერთპატივისცემას, - განაცხადა თსუ-ს ეკონომიკისა და ბიზნესის ფაკულტეტის დეკანმა მერაბ ხოხობაიამ სახელმწიფო უნივერსიტეტებში უფასო სწავლების მოდელთან დაკავშირებით.

მან აღნიშნა, რომ სტუდენტს სასწავლო პროცესში ჩართულობა მოეთხოვება.

„უნივერსიტეტში 100-ქულიანი შეფასების სისტემაა და კრედიტების დასაგროვებლად აუცილებელია მინიმუმ, 51 ქულის მიღება. შესაბამისად, მიმაჩნია, რომ სტუდენტებს ამ ნაწილში გარკვეული პასუხისმგებლობა აქვთ და ასევე გარკვეული მოტივაციაც, რომ ისინი აქტიურად მონაწილეობდნენ სასწავლო პროცესში. მთლიანობაში აღნიშნული მოდელი ეფუძნება ურთიერთპატივისცემას, რაც გულისხმობს იმას, რომ სახელმწიფო იღებს პასუხისმგებლობას დაფინანსებასთან დაკავშირებით, ხოლო სტუდენტებს, ბუნებრივია, მოეთხოვებათ, რომ ისინი მაქსიმალურად ჩართულები იყვნენ სასწავლო პროცესში“, - განაცხადა მერაბ ხოხობაიამ.

სახელმწიფო უნივერსიტეტებში უფასოდ სწავლის შესაძლებლობა განათლების მინისტრმა განმარტა. გივი მიქანაძემ აღნიშნა, რომ პირველი ორი სემესტრის განმავლობაში სახელმწიფო უნივერსიტეტის ყველა სტუდენტი სრულად დაფინანსდება, თუმცა ამ ორი სემესტრის განმავლობაში მათ უნდა უზრუნველყონ, დადგენილი კრედიტების მინიმუმ 80%-ის მიღება, რომ მესამე სემესტრში 100%-იანი დაფინანსება შეინარჩუნონ. მისი თქმით, იმ შემთხვევაში, თუ სტუდენტი კრედიტების 80%-ს ვერ დააგროვებს, სახელმწიფო მაინც შემოდის თანადაფინანსებაში.