მესტიის სატყეო უბანზე, ლახამულას ხეობაში წიწვოვანების ხმობის ფაქტი დაფიქსირდა - სატყეო ენტომოლოგებმა ადგილზე საველე კვლევა ჩაატარეს
სამეგრელო-ზემო სვანეთის სატყეო სამსახურის მესტიის სატყეო უბანზე - ლახამულას ხეობაში წიწვოვანების ხმობის ფაქტი დაფიქსირდა. სატყეო ენტომოლოგების მიერ ადგილზე საველე კვლევა განხორციელდა, შეფასდა ნაძვნარი კორომების სანიტარიული მდგომარეობა, რის შედეგადაც მავნებელ-დაავადებების არსებობის დამადასტურებელი ნიშნები გამოვლინდა.
„მბეჭდავი ქერქიჭამია ნაძვნარი კორომებისთვის მსოფლიოში ცნობილი მავნებელია. ეროვნულ სატყეო სააგენტოს აღნიშნული მავნებლის მონიტორინგისა და შესაბამისი ღონისძიებების განხორციელების მრავალწლიანი გამოცდილება აქვს. კერძოდ, სამცხე-ჯავახეთის რეგიონის ნაძვნარ კორომებში მბეჭდავი ქერქიჭამიას მონიტორინგი და შესაბამისი სანიტარიული ღონისძიებები სააგენტოს მიერ 2012 წლიდან ხორციელდება. ლახამულას ხეობაში მავნებლის მონიტორინგის მიზნით, ფერომონიანი მწერმჭერები განთავსდა. ტერიტორია რჩება სპეციალისტების დაკვირვების ქვეშ, რათა საჭიროების შემთხვევაში დროულად განხორციელდეს შესაბამისი სატყეო ღონისძიებები“, - განაცხადა ეროვნული სატყეო სააგენტოს უფროსის მოადგილემ, ნათია იორდანიშვილმა.
ლახამულას ხეობაში რელიეფური მდებარეობიდან გამომდინარე, რთულად მისადგომი კორომებია, ასეთ პირობებში სანიტარიული ღონისძიებების განხორციელება თითოეულ კონკრეტულ უბანზე ინდივიდუალურ შეფასებას საჭიროებს, რათა ტყის დაცვის მიზნებთან ერთად, თავიდან იქნეს აცილებული ადამიანების უსაფრთხოების, ნიადაგის ეროზიისა და გარემოს დაზიანების რისკები.
იმედი
წყარო: imedinews.ge