ნარენდრა მოდიმ ინდოელები რთული პერიოდის შესახებ გააფრთხილა და ქვეყანაში საწვავის დაზოგვისთვის რჩევები მისცა
ინდოეთის პრემიერ-მინისტრმა ნარენდრა მოდიმ მოსალოდნელი რთული პერიოდის შესახებ განაცხადა და ინდოელებს გლობალური ეკონომიკური არასტაბილურობის პირობების ფონზე პასუხისმგებლობისკენ მოუწოდა.
„პატრიოტიზმი მხოლოდ ქვეყნისთვის სიცოცხლის გაწირვის მზადყოფნა არ არის, არამედ რთულ დროს დისციპლინირებული ცხოვრების წესიც“, - აღნიშნა მან. მოდიმ მოსახლეობას რამდენიმე რჩევა გასცა, რომლებიც ქვეყანას საწვავის ხარჯების დაზოგვასა და ეკონომიკის განვითარებაში დაეხმარება:
გამოიყენონ საზოგადოებრივი ტრანსპორტი ყველგან, სადაც ეს შესაძლებელია; პრიორიტეტი მიანიჭონ მეტროსა და რკინიგზას, ასევე, ბენზინისა და დიზელის დაზოგვის მიზნით, გადასხდნენ ელექტრომობილებზე; არ წავიდნენ შვებულებაში საზღვარგარეთ და უპირატესობა შიდა ტურიზმს მიანიჭონ; აირჩიონ ადგილობრივი წარმოების საქონელი, რაც ქვეყანაში სამუშაო ადგილებს შექმნის და იმპორტზე დამოკიდებულებას შეამცირებს; მოსახლეობამ შეამციროს მცენარეული ზეთის მოხმარება, ხოლო ფერმერებმა - ორჯერ შეამცირონ სასუქების გამოყენება; განსაკუთრებული საჭიროების გარეშე არ შეიძინონ ოქრო, რაც, მოდის აზრით, სავალუტო რეზერვების ზედმეტი ხარჯვის თავიდან აცილებას შეუწყობს ხელს; მაქსიმალურად გადავიდნენ დისტანციურ მუშაობაზე, როგორც ეს COVID-19-ის პანდემიის დროს ხდებოდა.
მოდი დაჰპირდა მოსახლეობას, რომ თავადაც მეტროთი იმგზავრებს.
მედია წერს, რომ ინდოეთის პრემიერ-მინისტრის მოწოდება განპირობებულია ენერგომატარებლებზე მსოფლიო ფასების ზრდით, რაც გამოწვეულია აშშ-ისა და ისრაელის ირანის წინააღმდეგ ომით და მასზე მოყოლილი ჰორმუზის სრუტის ბლოკადით. ინდოეთში საწვავის ფასები მკვეთრად იზრდება. გამოცემა The Hindu-ს მონაცემებით, ქვეყანაში ნედლი ნავთობის მარაგი შესაძლოა მხოლოდ 25 დღეს ეყოს.
ინდოეთი ნავთობის მოხმარებით მსოფლიოში მესამე ადგილზეა და პლანეტის ყველაზე ხალხმრავალი ქვეყანაა. მისი მოსახლეობა 1,45 მილიარდ ადამიანს შეადგენს, რაც დედამიწის მთლიანი მოსახლეობის თითქმის ერთ მეხუთედს უტოლდება.
