ნიკოლოზ სამხარაძე ლუქსემბურგში გამართულ შეხვედრებზე: ამომწურავი ინფორმაცია მივაწოდეთ, თუ რა ხდება როგორც საქართველოში, ასევე რეგიონში, რა როლს თამაშობს საქართველო მშვიდობის დამყარების პროცესში სამხრეთ კავკასიაში, თუ რა გამოწვევების წინაშე დგას საქართველო რუსული ოკუპაციიდან გამომდინარე, რა პრობლემატიკაა ჩვენსა და ევროკავშირს შორის ურთიერთობებში

გვქონდა ძალიან საინტერესო დისკუსია იმ საკითხებზე, რომლებიც ეხება ორმხრივ ურთიერთობებს, ასევე უსაფრთხოების ვითარებას ჩვენს რეგიონში, - განაცხადა საქართველოს პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ ლუქსემბურგის პარლამენტის საგარეო და თავდაცვის კომიტეტების თავმჯდომარეებთან შეხვედრის შემდეგ.

მისი თქმით, განხილულ თემებს შორის იყო ასევე საქართველოს ევროატლანტიკური ინტეგრაცია, საქართველოს ინტეგრაცია ევროკავშირში და ასევე ეკონომიკური პროგრესი.

„ლუქსემბურგის პარლამენტის წევრებს ჰქონდათ კითხვები სწორედ ამ თემებთან დაკავშირებით და ჩვენ ამომწურავი ინფორმაცია მივაწოდეთ მათ იმის შესახებ, თუ რა ხდება როგორც საქართველოში, ასევე რეგიონში, რა როლს თამაშობს საქართველო მშვიდობის დამყარების პროცესში სამხრეთ კავკასიაში; ასევე, თუ რა გამოწვევების წინაშე დგას საქართველო რუსული ოკუპაციიდან გამომდინარე, რა პრობლემატიკაა ჩვენსა და ევროკავშირს შორის ურთიერთობებში.

ასევე ვთხოვეთ ლუქსემბურგის მხარეს, რომ ევროკომისიასთან დააყენოს საკითხი საქართველოსთან დიალოგის განახლების შესახებ.

შეხვედრა საკმაოდ საინტერესო წარიმართა, ძალიან დიდი ინტერესი გამოიწვია და რომ ძალიან ბევრი წევრი დაესწრო ამ შეხვედრას“, - განაცხადა ნიკოლოზ სამხარაძემ.

მან ლუქსემბურგის საგარეო საქმეთა სამინისტროში გამართულ შეხვედრაზეც ისაუბრა.

„ვიზიტის ფარგლებში და აქაც ჩვენ ვთხოვეთ ლუქსემბურგის მხარეს მხარდაჭერა, რომ საქართველოსთან დიალოგი განახლდეს. ჩვენ მზად ვართ ნებისმიერი ფორმატში დიალოგის განსაახლებლად. მზად ვარ ასევე კრიტიკულ საკითხებზე საუბრისთვის, მათ შორის გამჭვირვალობის კანონთან დაკავშირებით, რომელიც ფორმალური მიზეზი გახდა და ევროკავშირსა და საქართველოს შორის დიალოგის შეჩერების. ვიქრობთ, რომ ლუქსემბურგის მხარე საკმაოდ კონსტრუქციულად მოეკიდა ჩვენს პოზიციას და იმედი გვაქვს, რომ როდესაც იქნება წევრ ქვეყნებს შორის შეხვედრები, ლუქსემბურგი მხარს დაუჭერს საქართველოსთან დიალოგის განახლებას.

რაც შეეხება ორმხრივ ურთიერთობებს, აქ ჩვენ ერთმანეთთან პრობლემები არ გვაქვს. პირიქით, პოლიტიკური და ეკონომიკური ურთიერთობები ვითარდება და იმედი გვაქვს, რომ უახლოეს მომავალში ვუმასპინძლებთ ლუქსემბურგის დელეგაციას საქართველოში. ასევე ჩვენი ვიზიტის ფარგლებში დადასტურდა, რომ შემოდგომაზე საქართველოს პარლამენტის თავმჯდომარე ეწვევა ლუქსემბურგს“, - განაცხადა სამხარაძემ.