ნინო წილოსანი: ბუნებრივია, რომ ევროკავშირში გაწევრიანების მსურველი ბევრი ქვეყანა დაფიქრდება, ღირს თუ არა იმ კავშირში გაწევრიანება, რომელსაც აღარც ეკონომიკა აქვს და აღარც ძლიერი სამართლებრივი თუ პოლიტიკური საწყისები, რომლებზეც დაფუძნებული იყო ეს ყველაფერი

ბუნებრივია, რომ ევროკავშირში გაწევრიანების მსურველი ბევრი ქვეყანა დაფიქრდება, ღირს თუ არა იმ კავშირში გაწევრიანება, რომელიც აპრიორი ძლიერი ეკონომიკური კავშირი უნდა ყოფილიყო, თუმცა, როგორც ჩანს, აღარც ეკონომიკა აქვს და აღარც ძლიერი სამართლებრივი თუ პოლიტიკური საწყისები, რომლებზეც დაფუძნებული იყო ეს ყველაფერი, - განაცხადა პარლამენტის თავმჯდომარის მოადგილე ნინო წილოსანმა გადაცემაში „დღის ქრონიკა“.

მისივე თქმით, ევროკავშირი გახდა ორგანიზაცია, რომელიც, ფაქტობრივად, არც ქვეყნის სუვერენიტეტს სცემს პატივს, არც ამ ქვეყნის გადაწყვეტილებების პატივისცემა სურს და არც ამ ქვეყნის მონაწილეობა გადაწყვეტილებების მიღების პროცესში.

„არც კი ვიცი, რომელ სავალალო ფაქტს დავუკავშირო ის, რის წინაშეც ახლა ევროკავშირი დგას. ზუსტად ასეთი აბსურდული, უსამართლო და მიზანმიმართული ნეგატიური პოზიციები და განცხადებებია. ამ ადამიანმაც, რომელმაც ილაპარაკა ადამიანის უფლებათა დაცვასთან დაკავშირებით საქართველოში, რა თქმა უნდა, სრული დეზინფორმაცია გაავრცელა. ილაპარაკა ჩვენთვის, ყველასთვის ცნობილ დეზინფორმაციულ კამპანიებზე, რომ თითქოს ჟურნალისტებს ტყუილად ვახდევინებთ სასჯელს, ადამიანების უფლებები ირღვევა, პროტესტის მონაწილეები მშვიდობიანები იყვნენ, არანაირი ძალადობა არ ყოფილა და კიდევ ბევრი რამ.

ზუსტად ასეთმა მიდგომამ და დამოკიდებულებამ მიიყვანა ევროკავშირი იქამდე, რომ, მაგალითად, ისლანდიამ პირდაპირ თავად განაცხადა, რომ მათ აღარ სურთ მოლაპარაკებების გაგრძელების პროცესი, რადგან ეს არის, ფაქტობრივად, ორგანიზაცია, რომელიც არც ქვეყნის სუვერენიტეტს სცემს პატივს, არც ამ ქვეყნის გადაწყვეტილებების პატივისცემა უნდა და არც ამ ქვეყნის მონაწილეობა გადაწყვეტილებების მიღების პროცესში.

იმდენად მონური დამოკიდებულება ისახება, რომ მე ვერ წარმომიდგენია, რომელმა ფეხზე მდგარმა, შემდგარმა და სუვერენულმა სახელმწიფომ შეიძლება განაცხადოს თანხმობა ამ ყველაფერზე. ფაქტია, რომ ისლანდიის მოსახლეობამ ამაზე არჩევანი გააკეთა.

უფრო დიდი პრობლემა, რაც შეიძლება იყოს ევროკავშირისთვის, არის თუნდაც ურსულა ფონ დერ ლაიენის პირდაპირი გაცხადებული ნეგატიური სურათი, რომ ევროკავშირი ყველასთან აგებს ეკონომიკურ ომს. ეს ყველაფერი ევროკავშირს იმდენად ასუსტებს და მეათეხარისხოვან პლანზე გადაჰყავს, რომ, თავისთავად, ბუნებრივია, ევროკავშირში გაწევრიანების მსურველი ბევრი ქვეყანა დაფიქრდება, ღირს თუ არა იმ კავშირში გაწევრიანება, რომელიც აპრიორი ძლიერი ეკონომიკური კავშირი უნდა ყოფილიყო, თუმცა, როგორც ჩანს, აღარც ეკონომიკა აქვს და აღარც ძლიერი სამართლებრივი თუ პოლიტიკური საწყისები, რომელზეც დაფუძნებული იყო ეს ყველაფერი“, - განაცხადა წილოსანმა.