ნინო წილოსანი ირაკლი ღარიბაშვილის წერილებზე: შედეგად მივიღეთ ის, რომ ჩვენს რადიკალებს დღის წესრიგის შექმნის საშუალება მიეცათ

შედეგად მივიღეთ ის, რომ ჩვენს რადიკალებს მიეცათ დღის წესრიგის შექმნის საშუალება, - ასე აფასებს ნინო წილოსანი „დღის ქრონიკაში“ პატიმრობაში მყოფი ყოფილი პრემიერ-მინისტრის, ირაკლი ღარიბაშვილის წერილებს.

პარლამენტის თავმჯდომარის მოადგილე აღნიშნავს, რომ ღარიბაშვილმა წერილებით რადიკალებს სალაპარაკო მასალა ჩაუგდო.

„ძალიან მიჭირს ვისაუბრო ჩემ ყოფილ თანაგუნდელზე, რომლის წერილებზე დიდი აჟიოტაჟია ატეხილი, თუმცა ერთ შეფასებას გავაკეთებ: ბოლო პერიოდში ქართულ რეალობაში კარგად დამკვიდრდა, რომ ყველას, ვინც დანაშაულის გამო სასჯელს იხდის, პოლიტიკური პატიმარი უწოდონ, კონკრეტული საქმეების პოლიტიზება მოახდინონ და ამით გარკვეული მოგება ნახონ. „ნაციონალური მოძრაობის“ წარმომადგენლებიდან და ჩვენი ყველაზე რადიკალური ოპონენტებიდან მოყოლებული, ჩვენ ვიცით, რომ მათი ყველაზე ეფექტურად გამოყენებადი ინსტრუმენტი იყო პოლიტიკურად მოტივირებული საქმეების ვითომ დაანონსება და ამ სახელის დარქმევა.

სამწუხაროდ, ირაკლი ღარიბაშვილის მიერ გამოქვეყნებულ წერილებში ზუსტად ეს ხაზია გატარებული, რომ ეს საქმე არ არის სამართლებრივი, არამედ პოლიტიკური, თუმცა მე მიჭირს ამ საქმეს პოლიტიკურ ვუწოდო, იქიდან გამომდინარე, რომ მას თავად აქვს აღიარებული ის ბრალი, რომლისთვისაც სასჯელს იხდის. თუ არ ეთანხმებოდა, ალბათ მას ყველაზე მეტად ჰქონდა იმის საშუალება, რომ ამაზე თავი ემართლებინა.

მისი წერილების შემდეგ თუ გადავხედავთ, რა შეიცვალა და რა მივიღეთ, ვნახავთ, რომ მთელი ჩვენი რადიკალი ოპონენტების და მათი ტელევიზიების საინფორმაციო ბადე ამ წერილებითაა შევსებული. ფაქტია, რომ მხოლოდ ამ რადიკალებს ჩაუგდო სალაპარაკო მასალა“, - აღნიშნა წილოსანმა.