NYT: სეული ვაშინგტონს ჩრდილოეთ კორეისთვის ბირთვული პროგრამის გაყინვის სანაცვლოდ სანქციების შემსუბუქებისკენ მოუწოდებს

The New York Times-ის ცნობით, სამხრეთ კორეის პრეზიდენტმა ლი ჯე მიონმა შეერთებულ შტატებს მოუწოდა, შეამსუბუქოს ჩრდილოეთ კორეის წინააღმდეგ დაწესებული სანქციები, თუ ფხენიანი საკუთარ ბირთვულ პროგრამას გაყინავს.

„მიმაჩნია, რომ არსებობს სერიოზული სარგებელი კომპრომისში სანქციებსა და დამატებითი ბირთვული იარაღისა თუ ინტერკონტინენტური ბალისტიკური რაკეტების განვითარების შეჩერებას შორის“, - განაცხადა ლიმ ინტერვიუში.

სამხრეთ კორეის ლიდერის თქმით, არსებულ ვითარებაში სრულ დენუკლეარიზაციაზე მოთხოვნა უშედეგოა, ხოლო სტაგნაცია მეტისმეტად რისკიანია, რადგან ფხენიანს წელიწადში დამატებით 10-დან 20-მდე ბირთვული ქობინის წარმოება შეუძლია. მისი ხედვით, პირველ ეტაპზე პროგრამის გაყინვა და ნდობის აღდგენაა საჭირო.

სეული შორდება პოლიტიკას „ჯერ დენუკლეარიზაცია“ და გადადის მიდგომაზე „ჯერ მშვიდობა“. მიუხედავად იმისა, რომ ორ კორეას შორის ურთიერთობები გაყინულია და კიმ ჩენ ინმა სამხრეთი ყველაზე მტრულ სახელმწიფოდ გამოაცხადა, პრეზიდენტი ლი მიესალმება დონალდ ტრამპის ინიციატივას კიმთან ახალი შეხვედრის გამართვის შესახებ.