OpenAI-მ მოწინავე მოდელების სწავლება მას შემდეგ შეანელა, რაც მისმა ხელოვნური ინტელექტის აგენტებმა კონტროლი დაკარგეს და ჰაკერული შეტევა მოაწყვეს

OpenAI-ში განაცხადეს, რომ უსაფრთხოების გაზრდის მიზნით მოწინავე ხელოვნური ინტელექტის მოდელების სწავლება შეანელეს. კომპანიაში განმარტეს, რომ შეზღუდვები ბოლო დროს მომხდარი ინციდენტის ფონზე დაწესდა, როდესაც მისმა AI-აგენტებმა პლატფორმაზე Hugging Face ჰაკერული თავდასხმა განახორციელეს.

OpenAI-ის განცხადებით, ყველაზე დაწინაურებული მოდელების განმტკიცებით სწავლებაში ორკვირიანი პაუზა გამოცხადდა.

„მოწინავე მოდელების შესაძლებლობები სწრაფად იზრდება. ჩვენ მათ უნდა გავუსწროთ იმ ნაწილში, რაც უსაფრთხოების უზრუნველყოფას ეხება“, - ნათქვამია კომპანიის განცხადებაში.

OpenAI-მ ასევე დადო პირობა, რომ სწავლების ძველი მასშტაბით სრულფასოვნად განახლებამდე უსაფრთხოების დამატებით შემოწმებებს დანერგავს.

ივლისის შუა რიცხვებში OpenAI-ის ორმა AI-მოდელმა Hugging Face-ის სატესტო პლატფორმის ინფრასტრუქტურაზე ჰაკერული შეტევა განახორციელა. მოგვიანებით კომპანიაში განაცხადეს, რომ ინციდენტი დეველოპერების მიერ ამოცანის არასწორად დასახვის გამო მოხდა.