პარლამენტის საშემოდგომო სესია გაიხსნა

საქართველოს პარლამენტის საშემოდგომო სესიის პლენარული სხდომა საქართველოს სახელმწიფო ჰიმნით გაიხსნა.

პარლამენტის თავმჯდომარემ, შალვა პაპუაშვილმა პარლამენტის წევრებს მუშაობის განრიგი გააცნო და წარმატებული საქმიანობა უსურვა.

„გილოცავთ საშემოდგომო სესიის დაწყებას და მიმდინარე სესიის განმავლობაში წარმატებულ საქმიანობას გისურვებთ. ჩვენ მნიშვნელოვანი კანონპროექტების განხილვის შესაძლებლობა გვექნება და ყველას მოგიწოდებთ აქტიურად ჩაერთოთ საპარლამენტო საქმიანობაში. ასევე მინდა მადლობა გადავუხადო კომიტეტებს, რომლებიც ზაფხულის განმავლობაში აქტიურად მუშაობდნენ, მათ შორის, რეგიონებში გასვლითი სხდომების ჩატარებით. ამ ტემპით გავაგრძელოთ მუშაობა და პარლამენტის შენობაში გასამართი შეხვედრების და სხდომების გარდა, ასევე გასვლითი სხდომების ჩატარების შესაძლებლობა გამოვიყენოთ და რეგიონებში აქტუალური საკითხების განხილვა გავაგრძელოთ“, - განაცხადა შალვა პაპუაშვილმა.

საქართველოს კონსტიტუციის შესაბამისად და პარლამენტის რეგლამენტით დადგენილი წესით, წელიწადში ორჯერ – საგაზაფხულო და საშემოდგომო სესიები იმართება.

საშემოდგომო სესია სექტემბრის პირველ სამშაბათს იხსნება და დეკემბრის მესამე პარასკევს იხურება.