პარლამენტის წევრებმა კასპის მუნიციპალიტეტის სოფელ მეფისქალაქის საჯარო სკოლისთვის ეკატერინე გაბაშვილის სახელის მინიჭებასთან დაკავშირებით გამართულ ღონისძიებაში მიღეს მონაწილეობა

კასპის მუნიციპალიტეტის სოფელ მეფისქალაქის საჯარო სკოლას ქართველი მწერლისა და საზოგადო მოღვაწის, ეკატერინე გაბაშვილის სახელი მიენიჭა.

საქართველოს პარლამენტის თავმჯდომარის მოადგილის ნინო წილოსანის და კულტურის კომიტეტის თავმჯდომარის გიორგი გაბუნიას ინიციატივით გამართულ საზეიმო ღონისძიებაში საქართველოს პარლამენტის წევრებმა და აღმასრულებელი ხელისუფლების წარმომადგენლებმა მიიღეს მონაწილეობა.

ღონისძიების მონაწილეებს სიტყვით მიმართეს საქართველოს პარლამენტის თავმჯდომარის მოადგილემ, ნინო წილოსანმა, კულტურის კომიტეტის თავმჯდომარემ, გიორგი გაბუნიამ, განათლების, მეცნიერებისა და ახალგაზრდულ საქმეთა კომიტეტის თავმჯდომარემ, მარიამ ლაშხმა და განათლების, მეცნიერებისა და ახალგაზრდობის მინისტრის მოადგილემ, თამარ მახარაშვილმა.

როგორც პარლამენტისა და აღმასრულებელი ხელისუფლების წარმომადგენლებმა მისასალმებელ სიტყვაში აღნიშნეს, ეკატერინე გაბაშვილის სახელის მინიჭება სკოლისთვის მნიშვნელოვანი კულტურულ-საგანმანათლებლო მოვლენაა, რომელიც ხელს შეუწყობს მომავალი თაობებისთვის ქართველი მწერლისა და განმანათლებლის შემოქმედების უკეთ გაცნობას.

ღონისძიების ფარგლებში საქართველოს პარლამენტის თავმჯდომარის მოადგილემ ნინო წილოსანმა, კულტურის კომიტეტის თავმჯდომარემ, გიორგი გაბუნიამ, განათლების, მეცნიერებისა და ახალგაზრდულ საქმეთა კომიტეტის თავმჯდომარემ მარიამ ლაშხმა და განათლების, მეცნიერებისა და ახალგაზრდობის მინისტრის მოადგილემ თამარ მახარაშვილმა სკოლის ახალი აბრა და ეკატერინე გაბაშვილის სახელობის კაბინეტი საზეიმოდ გახსნეს.

კასპის მუნიციპალიტეტის სოფელ მეფისქალაქის საჯარო სკოლისთვის ეკატერინე გაბაშვილის სახელის მინიჭება და სკოლაში მისი სახელობის კაბინეტის გახსნა მწერლის დაბადებიდან 175 წლის იუბილეს მიეძღვნა.

ღონისძიებას სახელმწიფო რწმუნებული შიდა ქართლის მხარეში სიმონ გულედანი, კასპის მუნიციპალიტეტის მერი ვახტანგ მაისურაძე, ადგილობრივი ხელისუფლების წარმომადგენლები, პედაგოგები, მოსწავლეები და ეკატერინე გაბაშვილის შვილთაშვილი ზურაბ გაბაშვილი ესწრებოდნენ.