Politico: აშშ-მა პოლონეთი ქვეყანაში ამერიკული ჯარების რაოდენობის შემცირების შესახებ გააფრთხილა
აშშ პოლონეთში ამერიკული სამხედრო კონტინგენტის რაოდენობას შეამცირებს, - წერს Politico წყაროზე დაყრდნობით.
გამოცემის ცნობით, ჯერჯერობით გაურკვეველია, რამდენად მასშტაბური იქნება შემცირება. „შესაძლოა შემცირების მასშტაბები არ იყოს ისეთი მნიშვნელოვანი, როგორც ამას მედია იუწყება, თუმცა ჩვენც მივიღეთ მსგავსი ინფორმაცია“, - განაცხადა წყარომ, რომელიც პოლონეთის შეიარაღებული ძალების გენერალური შტაბის უფროსთან, გენერალ ვესლავ კუკულასთან დაახლოებული პირია.
ამერიკულმა გამოცემა Army Times-მა 13 მაისს გაავრცელა ინფორმაცია, რომ აშშ-მა გააუქმა ერთი ჯავშანსატანკო ბრიგადის გადასროლა, რომლის შემადგენლობაში 4 ათასზე მეტი სამხედრო შედის. მოსალოდნელი იყო, რომ ბრიგადა პოლონეთში 9 თვის განმავლობაში განთავსდებოდა. სამხედროებისა და ტექნიკის ნაწილი უკვე გზაშიც კი იმყოფებოდა.
Politico-ს მონაცემებით, ეს სიახლე პოლონელი სამხედროებისთვის მოულოდნელი იყო. მათ ამერიკელების გადაწყვეტილების შესახებ მედიიდან შეიტყვეს, რადგან, გამოცემის წყაროების თქმით, აშშ-ის მიერ 11 ან 12 მაისს გაგზავნილი გაფრთხილება გენერალ კუკულას საიდუმლო ფოსტაში „ჩაიკარგა“. გენერალური შტაბის უფროსმა ინფორმაცია დაქვემდებარებულებს მხოლოდ მას შემდეგ გადასცა, რაც ის ამერიკულ გამოცემებში გავრცელდა.
პოლონეთის თავდაცვის მინისტრმა, ვლადისლავ კოსინიაკ-კამიშმა 14 მაისს განაცხადა, რომ ამერიკელმა გენერალმა ალექსუს გრინკევიჩმა ის დაარწმუნა, რომ დისლოკაციის პროცესის შეჩერება პოლონეთში ამერიკული ჯარების რაოდენობის შემცირებას არ ნიშნავს.
ამჟამად პოლონეთში როტაციის წესით 10 ათასზე მეტი ამერიკელი სამხედრო იმყოფება.
აშშ-ის პრეზიდენტმა დონალდ ტრამპმა მაისის დასაწყისში გერმანიიდან 5 ათასი ამერიკელი სამხედროს გაყვანის შესახებ გასცა ბრძანება. შედეგად, ევროპაში ამერიკული ჯარების რაოდენობა უკრაინაში რუსეთის შეჭრამდე არსებულ ნიშნულს დაუბრუნდა. The Wall Street Journal-ის აპრილის დასაწყისის მონაცემებით, მთელ ევროპაში დაახლოებით 84 ათასი ამერიკელი სამხედრო იმყოფებოდა.
