POLITICO: მერცს დამაჯერებელი პასუხები არ აქვს - ულტრამემარჯვენეები მის პოლიტიკურ დასასრულს უმიზნებენ

გერმანიის ულტრამემარჯვენე ძალები ცდილობენ არჩევნებში მოპოვებული გამანადგურებელი გამარჯვება ფრიდრიხ მერცისა და მისი დასუსტებული კონსერვატორების წინააღმდეგ საბოლოო დარტყმად აქციონ - კანცლერს კი, როგორც ჩანს, პასუხის გასაცემად მკაფიო გეგმა არ აქვს. ინფორმაციას POLITICO ავრცელებს.

გამოცემის ცნობით, მერცს, როგორც ჩანს, არ აქვს მკაფიო გეგმა საკუთარი თავისა და პარტიის გადასარჩენად მაშინ, როდესაც მისი მთავრობა დღემდე ყველაზე მძიმე პოლიტიკური კრიზისის წინაშე აღმოჩნდა. კანცლერობის 16 თვის თავზე ერთადერთი, რასაც მერცი ხალხს სთავაზობს, არის ბუნდოვანი დაპირებები, რომ უკეთესი და უფრო ემპათიური პოლიტიკოსი გახდება.

„ჩვენ ყველანი ღრმად ვართ შოკირებულნი“, - განაცხადა მერცმა ორშაბათს მას შემდეგ, რაც ულტრამემარჯვენე პარტიას „ალტერნატივა გერმანიისთვის“ (AfD) შაბათ-კვირის არჩევნებში საქსონია-ანჰალტში მხარდაჭერის ახალი რეკორდული მაჩვენებელი ჰქონდა მაშინ, როცა „ქრისტიან-დემოკრატიული კავშირის“ (CDU) მხარდაჭერა ნახევარზე მეტად შემცირდა.

„ეს არის ყველაზე მძიმე საარჩევნო მარცხი, რომელიც CDU-ს ბოლო წლებში ან თუნდაც ათწლეულების განმავლობაში განუცდია. რა თქმა უნდა, ამას შედეგები უნდა მოჰყვეს“, - განაცხადა კანცლერმა.

თუმცა რა შედეგებზეა ლაპარაკი, ჯერ კიდევ გაურკვეველია. მერცის კატასტროფულმა რეიტინგმა და AfD-ის დამაჯერებელმა გამარჯვებამ გააჩინა ვარაუდი, რომ კონსერვატორებმა პოლიტიკური მდგომარეობის გამოსასწორებლად შესაძლოა ე.წ. Kanzlertausch, ანუ „კანცლერის შეცვლა“ განიხილონ. თუმცა მერცმა ორშაბათს განაცხადა, რომ თანამდებობაზე დარჩება და გააგრძელებს ეკონომიკურ რეფორმებს, რომლებიც, მისი თქმით, დიდი ხნის წინ იყო საჭირო და დროთა განმავლობაში ქვეყნის ეკონომიკურ პრობლემებს მოაგვარებს.

POLITICO-ს ცნობით, AfD-ს არ დაუმალავს განზრახვა, რომ არჩევნებში კონსერვატორების მარცხი მერცისთვის კიდევ უფრო მძიმე პოლიტიკურ კატასტროფად აქციოს. ულტრამემარჯვენე პარტია ღიად ცდილობს საქსონია-ანჰალტის კონსერვატიული დეპუტატების გადაბირებას და მათ რიგებში გაწევრიანებას. ეს სტრატეგია მხოლოდ იმ სამი დამატებითი მანდატის მოპოვებას არ ემსახურება, რომლებიც პარტიას ერთპიროვნული მმართველობისთვის სჭირდება. მისი მიზანია კონსერვატორთა ბლოკის დაშლა და მერცის მიერ საკუთარ პარტიაზე კონტროლის შესუსტებაც.

„კონსერვატიული ბლოკი ფედერალურ არჩევნებში გამარჯვებას ვეღარასდროს შეძლებს. ეს ფაქტია. ჩვენსა და მათ შორის სხვაობა უკვე 10%-ია და ჩემი გაცხადებული მიზანია ეს სხვაობა უმოკლეს დროში მნიშვნელოვნად გავზარდო“, - განაცხადა AfD-ის თანათავმჯდომარემ ალის ვაიდელმა.

მერცმა ორშაბათს აღიარა, რომ თავადაც არის პრობლემის ნაწილი. გერმანიის საზოგადოებრივი მაუწყებლის დაკვეთით ჩატარებული ეგზიტპოლის თანახმად, საქსონია-ანჰალტში არჩევნებზე მისული ამომრჩევლების მხოლოდ 9% იწონებდა მის საქმიანობას კანცლერის თანამდებობაზე.

„ვიცი, რომ ჩემი პერსონაც ამ საარჩევნო კამპანიის განმავლობაში არაერთხელ ყოფილა განხილვის საგანი“, - განაცხადა მერცმა.

მისივე თქმით, გერმანელები რთულ პერიოდში ქვეყნის ეკონომიკურ კეთილდღეობასა და უსაფრთხოებაზე ღელავენ. „ჩვენ, მათ შორის მეც, უნდა ვეცადოთ უფრო კარგად დავუკავშირდეთ ადამიანებს, მათ შორის მათ ემოციებს, მთელი მათი მრავალფეროვნებით“, - განაცხადა კანცლერმა.

მერცზე წნეხი, სავარაუდოდ, უახლოეს კვირებში კიდევ უფრო გაიზრდება, განსაკუთრებით, იმის გათვალისწინებით, რომ 20 სექტემბერს გერმანიის აღმოსავლეთის ორ რეგიონში არჩევნებია დაგეგმილი, წერს გამოცემა.

გამოცემა ვარაუდობს, რომ მერცის CDU-ს მეკლენბურგ-დასავლეთ პომერანიაში აშკარა მარცხი ელოდება, სადაც AfD ყველა სხვა პარტიას უსწრებს. ბერლინში კი, სადაც ამჟამად CDU უმრავლესობაშია, პარტია, სავარაუდოდ, ხელისუფლებას მემარცხენე პარტიების კოალიციის სასარგებლოდ დაკარგავს.

მომავალ წელს კიდევ ოთხი რეგიონული არჩევნებია დაგეგმილი, რის გამოც კონსერვატორების წინაშე არსებული არჩევანი სულ უფრო მკაფიო ხდება: განაგრძონ მზარდ მემარჯვენე ძალასთან დაპირისპირება უკიდურესად არაპოპულარული კანცლერის პირობებში, თუ რადიკალურად შეცვალონ კურსი და სათავეში ახალი ლიდერი დააყენონ.