პოლონური მედია: ინტერნეტში დონალდ ტუსკის მისამართით გავრცელებული მკვლელობის მუქარის გამო გამოძიება დაიწყო

პოლონეთის ქალაქ კლოდზკოს რაიონულმა პროკურატურამ დაიწყო გამოძიება ქვეყნის პრემიერ-მინისტრის დონალდ ტუსკის მისამართით ინტერნეტში გავრცელებული მკვლელობის მუქარის ფაქტზე. ინფორმაციას პოლონური მედია ავრცელებს.

პროკურორ მალგოჟატა ჩაიკოვსკას განცხადებით, გამოძიებისთვის დაუდგენელმა პირმა სოციალურ ქსელში კომენტარი დაწერა, რომელიც პოლონეთის მთავრობის თავმჯდომარის მისამართით მკვლელობის მუქარას შეიცავდა.

როგორც პოლონური მედია წერს, სამართალდამცველებმა დაადგინეს მისამართი, თუ საიდან გამოქვეყნდა კომენტარი, რის შემდეგაც ჩხრეკა ჩაატარეს. საგამოძიებო მოქმედებების შედეგად პოლიციელებმა ელექტრონული მოწყობილობები და სხვა ნივთები ამოიღეს.

სამართალდამცველების მიერ სახლის ჩხრეკისას აგრეთვე ამოღებულია ცეცხლსასროლი იარაღის მჭიდი „პარაბელუმის“ ტიპის სამი ვაზნით.

„ეჭვმიტანილი დადგენილია, მაგრამ ჩვენ ჯერ დარწმუნებულები არ ვართ, კონკრეტულად ვინ ატვირთა აღნიშნული კონტენტი ინტერნეტში“, - განაცხადა პროკურორმა.

საქმეზე გამოძიება გრძელდება. პოლონეთის სისხლის სამართლის კოდექსის თანახმად, ქვეყნის კონსტიტუციური ორგანოს წარმომადგენლის მიმართ განხორციელებული მუქარა და შეურაცხყოფა ორ წლამდე პატიმრობით ისჯება.