რა საკადრო ცვლილებები განხორციელდა ძალოვან სტრუქტურებში. „ქრონიკის“ სიუჟეტი

სახელმწიფო უსაფრთხოების სამსახურის უფროსის მოადგილე, ლევან ხარაბაძე ფინანსთა სამინისტროს საგამოძიებო სამსახურის ხელმძღვანელად დაინიშნა. ის ფინანსთა მინისტრმა უწყების თანამშრომლებს უკვე წარუდგინა.

მამუკა მდინარაძის დანარჩენი სამივე მოადგილე თანამდებობას ინარჩუნებს. გეკა გელაძემ ისინი შს მინისტრის ყოფილ მოადგილე, მარიამ ტაბატაძესთან ერთად, უკვე წარუდგინა უწყების თანამშრომლებს.

სუს-ის ადმინისტრაციის ყოფილი უფროსი კი მთავრობის ადმინისტრაციის უფროსის მოადგილედ დაინიშნა. ავთანდილ კუნჭულია, ადმინისტრაციაში სამართალდამცავი ორგანოების საკითხებს უხელმძღვანელებს.

სწორედ სამართალდამცავი ორგანოების კოორდინაცია შედის მამუკა მდინარაძის უფლებამოსილებაში, ასევე სახელმწიფო მინისტრი უზრუნველყოფს საქართველოს მთავრობის კოორდინაციას პროკურატურასთან, სახელმწიფო აუდიტის სამსახურსა და სასამართლო ხელისუფლებასთან.

კიდევ ერთი საკადრო ცვლილება - სახელმწიფო უსაფრთხოების სამსახურის უფროსმა, გეკა გელაძემ სპეციალური ოპერაციების დეპარტამენტის პირად შემადგენლობას ახალი ხელმძღვანელი რომან ქარცივაძე წარუდგინა.

გეკა გელაძემ, მოადგილეებთან და სპეციალური ოპერაციების დეპარტამენტის ახალ დირექტორთან ერთად, ბაზაზე არსებული ინფრასტრუქტურა, შეიარაღება და საბრძოლო ტექნიკა დაათვალიერა.

შინაგან საქმეთა მინისტრმა სულხან თამაზაშვილმა კი მომსახურების სააგენტოს თანამშრომლებს ახალი ხელმძღვანელი, შალვა კბილაშვილი წარუდგინა.