რა ვითარებაა ამ დროისთვის უკრაინაში

რუსეთის არმიამ დარტყმები მიიტანა კიევზე, ოდესასა და უკრაინა-პოლონეთის საზღვართან მდებარე სატრანსპორტო ინფრასტრუქტურაზე. 13 სექტემბერს, დილით, რუსული დრონი პოლონეთ-უკრაინის საზღვრიდან დაახლოებით 800 მეტრში, „იაჰოდინის“ გამშვებ პუნქტთან მდებარე სატვირთო ავტომობილს მოხვდა. ინფორმაცია პოლონეთის სასაზღვრო სამსახურმა გაავრცელა. კიდევ ერთი დარტყმა საზღვრიდან 2 კილომეტრში, სამგზავრო მატარებლის ლოკომოტივზე განხორციელდა. დაშავებულების შესახებ ინფორმაცია არ გავრცელებულა.

ტელეკომპანია „სუსპილნეს“ ცნობით, იერიში მიიტანეს ასევე „იაჰოდინის“ საკონტროლო-გამშვებ პუნქტთან მდებარე ავტოგასამართ სადგურზე. უკრაინის სასაზღვრო სამსახურის წარმომადგენელმა სააგენტო „ინტერფაქს-უკრაინასთან“ დააზუსტა, რომ უშუალოდ გამშვებ პუნქტზე პირდაპირი დარტყმა არ ყოფილა.

„ეს არის პუტინის ტერორი, რომელიც უშუალოდ ევროკავშირისა და ნატოს კარზე აკაკუნებს. ძვირფასო პარტნიორებო, რუსი ბარბაროსები უკვე თქვენს კარიბჭესთან არიან“, - ასე გამოეხმაურა თავდასხმას უკრაინის საგარეო საქმეთა მინისტრი ანდრიი სიბიჰა.

12 სექტემბრის საღამოს და გასულ ღამეს რუსეთის ჯარებმა დარტყმები მიიტანეს ნიკოლაევზე, ასევე კიევისა და ოდესის ოლქებზე. ოდესის ოლქში უპილოტო საფრენი აპარატით „ნოვა პოშტას“ განყოფილებაზე განხორციელებული თავდასხმის შედეგად ორი ადამიანი დაშავდა, ოდესაში კი მრავალსართულიანი საცხოვრებელი სახლი დაზიანდა, არიან დაჭრილები. კიევის ოლქის ბორისპოლის რაიონში ხანძარი გაჩნდა სასაწყობო ფართების ტერიტორიაზე. ნიკოლაევზე მიტანილი იერიშების შედეგად კი რამდენიმე რაიონს ელექტრომომარაგება ნაწილობრივ შეეზღუდა.