ჰენრი სეჰუდო მერაბ დვალიშვილზე: შაბათს საღამოს მერაბთან ვიჭიდავებ - ჩვენ მეტოქეები ვართ, მაგრამ ამავდროულად სპორტსმენებიც ვართ და ერთმანეთის მიმართ პატივისცემა გვაკავშირებს. მან თავისი ქვეყანა დამათვალიერებინა და ამისთვის ძალიან მადლიერი ვარ

RAF Georgia-ს მონაწილეებმა თბილისი დაათვალიერეს. მსოფლიო დონის მოჭიდავეები, მათ შორის UFC-ის ყოფილი ჩემპიონები მერაბ დვალიშვილი და ჰენრი სეჰუდო, დედაქალაქის ისტორიულ და კულტურულ ღირსშესანიშნაობებს ესტუმრნენ. ტური ძველი თბილისის საფეხმავლო მარშრუტს მოიცავდა. სტუმრებს საქართველოს ისტორიისა და კულტურის შესახებ ინფორმაცია პროფესიონალმა გიდებმა გააცნეს.

„იციან, რომ გვყავს ძლიერი სპორტსმენები, ძლიერი ათლეტები. იციან, რომ ვართ ისტორიული ქვეყანა, გვაქვს დიდი წარსული, ვართ ღვინის სამშობლო, ვართ სტუმართმოყვარე ხალხი, რაც მთავარია“, - განაცხადა მერაბ დვალიშვილმა.

ჰენრი სეჰუდომ, რომელსაც დვალიშვილი დაუპირისპირდება, საქართველოში მიღებულ შთაბეჭდილებებსა და ქართველი სპორტსმენის მიმართ დამოკიდებულებაზე ისაუბრა.

„საქართველო ულამაზესი ქვეყანაა. შეხედეთ ამ ხედებს, მთებს - აქ საოცრად ერწყმის ერთმანეთს ქალაქი და ბუნება. ყველაფერი შესანიშნავად მიდის. შაბათს საღამოს მერაბთან ვიჭიდავებ და ამას დიდი მოლოდინით ველოდებით. ჩვენ მეტოქეები ვართ, მაგრამ ამავდროულად სპორტსმენებიც ვართ და ერთმანეთის მიმართ პატივისცემა გვაკავშირებს. მან თავისი ქვეყანა დამათვალიერებინა და ამისთვის ძალიან მადლიერი ვარ“, - განაცხადა სეჰუდომ.

ვიზიტი საქართველოს ტურიზმის ეროვნული ადმინისტრაციის მხარდაჭერით დაიგეგმა, რომელიც მიზნად ისახავდა საერთაშორისო სპორტსმენებისთვის საქართველოს ტურისტული პოტენციალის გაცნობასა და ქვეყნის პოპულარიზაციას.

თავისუფალი ჭიდაობის საერთაშორისო ღონისძიება 11 ივლისს, 20:00 საათზე დაიწყება და პირდაპირ რეპორტაჟს ტელეკომპანია „იმედი“ შემოგთავაზებთ. შეჯიბრზე 8 ოლიმპიური ჩემპიონი იჭიდავებს.