რენუარის მუზეუმიდან €9 მილიონის ღირებულების ნახატები მოიპარეს
პიერ ოგიუსტ რენუარის მუზეუმიდან 9 მილიონი ევროს ღირებულების ნახატები მოიპარეს. ინციდენტი საფრანგეთის სამხრეთ-აღმოსავლეთით მდებარე ქალაქ კანი-სიურ-მერში მოხდა. განგაშის სისტემა 8 სექტემბერს, დილის 05:48 საათზე ამოქმედდა. ინფორმაცია ქალაქის მერმა ბრაიან მასონმა დაადასტურა, ადგილობრივი მედია კი იუწყება, რომ უცნობმა პირებმა ნახატები ჩარჩოებიდან ამოჭრეს.
თავდამსხმელებმა შეამჩნიეს, რომ სათვალთვალო კამერების ობიექტივში მოხვდნენ და გაქცევა გადაწყვიტეს. ამ დროს გზაში ერთ-ერთი მოპარული ნახატი დააგდეს. ხელისუფლებას ჯერ არ დაუზუსტებია, კონკრეტულად, რომელი ნამუშევრებია მოპარული. ჯერჯერობით უცნობია, საქმე ეხება თავად რენუარის ტილოებს თუ სხვა მხატვრების ნამუშევრებს. ზარალი 9 მილიონ ევროდ ფასდება.
მუზეუმი 1960 წელს იმ ვილაში გაიხსნა, სადაც რენუარმა სიცოცხლის უკანასკნელი წლები გაატარა. კოლექცია სხვა მხატვრების ნამუშევრებსაც მოიცავს, რომელთა შორის არიან არისტიდ მაიოლი, პიერ ბონარი და რაულ დიუფი.
იმედი
წყარო: imedinews.ge