Reuters: აშშ-ის ხელისუფლება ტრანსგენდერული პოლიტიკის გამო ორი ოლქის სკოლას დაფინანსების შეწყვეტით ემუქრება

აშშ-ის განათლების დეპარტამენტი მიჩიგანისა და მერილენდის შტატებში სკოლებს ფედერალური დაფინანსების შეწყვეტით დაემუქრა. ინფორმაციას Reuters-ი ავრცელებს.

სააგენტოს ცნობით, დაფინანსების შეწყვეტის მუქარის მიზეზი მათი ტრანსგენდერული პოლიტიკაა.

განათლების დეპარტამენტმა სკოლებს გაფრთხილება გაუგზავნა, რომ, თუ ისინი წესებს ფედერალურ სტანდარტებთან შესაბამისობაში არ მოიყვანენ, შეუწყდებათ დაფინანსება და შესაძლოა სამართლებრივი დავაც კი დაიწყოს.

Reuters-ის ცნობით, აშშ-ის პრეზიდენტის დონალდ ტრამპის ადმინისტრაციის ახალი პოლიტიკის მიხედვით, განათლების დეპარტამენტისთვის მიუღებელია, რომ სკოლები მშობლებს მოსწავლეთა გენდერულ სტატუსს უმალავენ და ასევე უარს არ ამბობენ ტრანსგენდერი მოსწავლეების სპორტულ შეჯიბრებებში მონაწილეობაზე.