Reuters: ბერძენი მეხანძრეები ზედიზედ მეორე დღეა კრეტაზე ტყის ხანძრებს ებრძვიან

ბერძენი მეხანძრეები უკვე მეორე დღეა ზედიზედ კუნძულ კრეტაზე გაჩენილ ტყის ხანძრებს ებრძვიან. ინფორმაციას Reuters-ი ავრცელებს.

სააგენტოს ცნობით, გუშინ კრეტასა და საბერძნეთის კონტინენტურ ნაწილში ძლიერი ქარის პირობებში ხანძრებთან ბრძოლას სამი ბერძენი მეხანძრე ემსხვერპლა, კიდევ ორი კი მსუბუქად დაშავდა.

ორი მეხანძრე დაიღუპა კრეტაზე, კუნძულის ცენტრალურ ნაწილში მდებარე სოფელ კრია ვრისის მახლობლად გაჩენილი ხანძრის დროს. ისინი ცეცხლის სხვადასხვა კერას შორის გადაადგილდებოდნენ, როდესაც ხანძრის ალყაში მოექცნენ. კიდევ ერთი მეხანძრე პელოპონესის რეგიონში ასევე ხანძართან ბრძოლისას დაიღუპა.

როგორც Reuters-ი იუწყება, გუშინ ასობით ადგილობრივი მცხოვრები და ტურისტი კრია ვრისიდან და ახლომდებარე სხვა სოფლებიდან, რომლებიც კუნძულის ცენტრალურ ნაწილში მდებარეობს, ხმელეთით და ზღვით გაიყვანეს. ძლიერი ქარის გამო ცეცხლის ლოკალიზება გართულებულია. ის პოპულარულ ტურისტულ ზონებს უკვე მიუახლოვდა.

დღეის მდგომარეობით, კრეტაზე ორ დიდ ხანძარს 200-ზე მეტი მეხანძრე, ათობით სახანძრო მანქანა და ავიაცია ებრძვის. ხანძარმა გაანადგურა სასოფლო-სამეურნეო კულტურები და ზეთისხილის ბაღები, ასევე დააზიანა საწყობები და რამდენიმე საცხოვრებელი სახლი.

„სამწუხაროდ, გაუმჯობესება არ შეინიშნება და ბოლო ინფორმაციით, დღის მეორე ნახევარში ქარი კიდევ უფრო გაძლიერდება“, - განაცხადა კრეტას სამოქალაქო დაცვის საკითხებში რეგიონული გუბერნატორის მოადგილემ გიორგოს ცაპაკოსმა.

მისივე თქმით, ძლიერი ქარის გამო თვითმფრინავებმა დღეს დილით ხანძრის ქრობის სამუშაოებში მონაწილეობა ვერ შეძლეს.

ევროკავშირის საგანგებო სიტუაციებზე რეაგირების ცენტრის განაცხადებით, საბერძნეთსა და იტალიას უახლოეს კვირებში ხანძრების მაღალი რისკი ელით.