Reuters: დიდმა ბრიტანეთმა, საფრანგეთმა და კანადამ ისრაელის დასავლეთ სანაპიროს დასახლებების წინააღმდეგ სანქციები შემოიღეს

დიდმა ბრიტანეთმა დასავლეთ სანაპიროზე ებრაულ დასახლებებში წარმოებული საქონლის იმპორტზე სავაჭრო აკრძალვა დააწესა. გადაწყვეტილება საფრანგეთთან და კანადასთან კოორდინაციით იქნა მიღებული და ისრაელის წინააღმდეგ დაწესებული უახლესი სანქციაა იმ ფონზე, როდესაც ქვეყანა საერთაშორისო დიპლომატიური იზოლაციის მზარდი საფრთხის წინაშე დგას, იუწყება Reuters-ი.

ბრიტანეთის საგარეო საქმეთა მინისტრმა ედ მილიბენდმა განაცხადა, რომ ლონდონს აღარ შეუძლია უბრალოდ „დაგმოს“ უსამართლობა და ადამიანთა ტანჯვა. მისი თქმით, ქვეყანამ ახლა „უნდა იმოქმედოს“, რათა დასახლებების გაფართოებას დაუპირისპირდეს.

„დღეს ჩვენ უარს ვამბობთ ვიყოთ შემდგომი ტანჯვისა და ორი სახელმწიფოს შექმნის გადაწყვეტილების განადგურების უმოქმედო დამკვირვებლები", – განაცხადა მილიბენდმა თემთა პალატაში სიტყვით გამოსვლისას. მან ამით ბრიტანეთის მრავალწლიან მხარდაჭერაზე მიუთითა ორი სახელმწიფოს შექმნის იდეის მიმართ, რომელსაც ისრაელი ეწინააღმდეგება.

აშშ-ის ელჩმა ისრაელში მაიკ ჰაკაბიმ ბრიტანეთის მიერ დაწესებული ახალი სანქციები უკვე გააკრიტიკა, ხოლო ისრაელის ორი მინისტრი ბრიტანეთის წინააღმდეგ საპასუხო ზომების მიღების მოწოდებით გამოვიდა.

მილიბენდმა, რომელიც ბრიტანეთის საგარეო საქმეთა მინისტრი ივლისში გახდა, ასევე განაცხადა, რომ ლონდონის პოზიციის მიხედვით, დასავლეთ სანაპიროს ოკუპაცია უკანონოა. მისივე თქმით, ბრიტანეთი მიიჩნევს, რომ დასავლეთ სანაპიროს გარკვეულ ტერიტორიებზე პალესტინელების ეთნიკური წმენდა მიმდინარეობს.

როგორც Reuters-ი იუწყება, სავარაუდოდ, სანქციების გავლენა ბრიტანეთსა და ისრაელს შორის წლიურ, დაახლოებით 6 მილიარდი ფუნტის ორმხრივ ვაჭრობაზე მინიმალური იქნება. ამასთან, ჯერჯერობით უცნობია, როგორ განასხვავებს ბრიტანეთი დასავლეთ სანაპიროს დასახლებებში წარმოებულ საქონელს ისრაელში წარმოებული პროდუქციისგან.

ისრაელის ორმა გავლენიანმა მინისტრმა გადაწყვეტილება მწვავედ გააკრიტიკა. ფინანსთა მინისტრმა ბეცალელ სმოტრიჩმა ბრიტანეთის ელჩის თელ-ავივიდან გაძევება მოითხოვა, ხოლო ეროვნული უსაფრთხოების მინისტრმა იტამარ ბენ-გვირმა პრემიერ-მინისტრ ბენიამინ ნეთანიაჰუს მოუწოდა, აღმოსავლეთ იერუსალიმში ბრიტანეთის საკონსულო დახუროს. საკონსულო დასავლეთ სანაპიროზე მოქმედ პალესტინის ხელისუფლებასთან არის აკრედიტებული.

ამასობაში, ისრაელის პრეზიდენტმა იცხაკ ჰერცოგმა ბრიტანეთი ისრაელში დაგეგმილ არჩევნებში ჩარევაში დაადანაშაულა. არჩევნები ოქტომბრის ბოლოს უნდა გაიმართოს.

სააგენტოს ცნობით, ბოლო პერიოდში შეშფოთების მთავარი მიზეზი დასავლეთ სანაპიროზე, იერუსალიმთან ახლოს ისრაელის E1 დასახლების პროექტია. მისი განხორციელება გადაკვეთს იმ ტერიტორიას, რომელსაც პალესტინელები მომავალი დამოუკიდებელი სახელმწიფოს ადგილად მიიჩნევენ. მილიბენდის განცხადებით, პროექტი ორი სახელმწიფოს შექმნის გადაწყვეტილებას საფრთხეს უქმნის.