Reuters: იაპონიაში 7,1 მაგნიტუდის მიწისძვრის შედეგად ათასობით აბონენტი ელექტროენერგიის გარეშე დარჩა, დაშავდა სულ მცირე 50 ადამიანი

სამხრეთ იაპონიის კუმამოტოს პრეფექტურაში სამშაბათს მომხდარმა 7,1 მაგნიტუდის მიწისძვრამ ათასობით საცხოვრებელი სახლი ელექტროენერგიის გარეშე დატოვა, დააზიანა გზები და სულ მცირე 50 ადამიანი დაშავდა. ინფორმაციას Reuters-ი ავრცელებს.

სააგენტოს ცნობით, დაშავებულთა შორის არიან ადამიანები, რომლებიც ნაწილობრივ ჩამონგრეულ სავაჭრო ცენტრში იმყოფებოდნენ.

ჟურნალისტებთან საუბრისას იაპონიის პრემიერ-მინისტრმა სანაე ტაკაიჩიმ განაცხადა, რომ მსხვერპლის რაოდენობა და ზარალის მასშტაბი ჯერ კიდევ ზუსტდება.

„უკვე მივიღეთ ინფორმაცია დაშავებულების შესახებ. რიგ რაიონებში დაფიქსირდა ელექტროენერგიის გათიშვა და ხანძრები, ასევე დაზიანებულია გზები და ხიდები, ჩამოინგრა შენობებიც“, - განაცხადა ტაკაიჩიმ.

ის მოსახლეობას მოუწოდებს, იზრუნონ საკუთარ უსაფრთხოებაზე, მათ შორის, საჭიროების შემთხვევაში, უსაფრთხო ადგილზე ევაკუაციის გზით.

იაპონიის საზოგადოებრივი მაუწყებლის ცნობით, ერთ-ერთმა საავადმყოფომ უკვე 50-ზე მეტი დაშავებული მიიღო. გაზეთ Nikkei-ის ინფორმაციით, მიწისძვრის დროს ჩქაროსნულ მატარებელში მყოფი რამდენიმე მგზავრიც დაშავდა.

საგანგებო სამსახურების განცხადებით, მიწისძვრის გამო მომხდარი აფეთქების შედეგად დაზიანებულ Aeon-ის სავაჭრო ცენტრში რამდენიმე ადამიანი იყო ჩარჩენილი.

Aeon-ის წარმომადგენლის თქმით, პირველი ბიძგების შემდეგ სავაჭრო ცენტრიდან მომხმარებლებისა და თანამშრომლების ევაკუაცია დაუყოვნებლივ განხორციელდა, თუმცა აფეთქების ზუსტი მიზეზი ამ დრომდე უცნობია.