Reuters: ლონდონის საზღვაო სადაზღვევო ბაზარმა შავი ზღვის მაღალი რისკის ზონა გააფართოვა

შავ ზღვაში გემებზე თავდასხმების გახშირების ფონზე, ლონდონის საზღვაო სადაზღვევო ბაზარმა მაღალი რისკის ზონა გააფართოვა. ინფორმაციას Reuters-ი ავრცელებს.

სააგენტოს ცნობით, შავი ზღვა მარცვლეულის, ნედლი ნავთობისა და ნავთობპროდუქტების გადაზიდვისთვის მნიშვნელოვანი მარშრუტია. მისი აკვატორია რუსეთისა და უკრაინის, ასევე ბულგარეთის, საქართველოს, რუმინეთისა და თურქეთის სანაპიროებს მოიცავს.

Reuters-ის ინფორმაციით, ბოლო ორი თვის განმავლობაში რუსეთმა და უკრაინამ ერთმანეთის კომერციულ გემებზე თავდასხმები გააძლიერეს, რაც უკვე მეხუთე წელია მიმდინარე ომის კიდევ ერთ ესკალაციას წარმოადგენს.

სადაზღვევო კომპანიების მიერ რისკების შეფასებასა და შესაბამის სადაზღვევო პრემიებს ორგანიზაცია „ერთიანი საომარი კომიტეტი“ (JWC) განსაზღვრავს, რომელიც Lloyd's Market Association-ის სინდიკატების წევრებსა და ლონდონის სადაზღვევო ბაზრის წარმომადგენლებს აერთიანებს.

„ამ კვირაში JWC-მ შავ ზღვასთან დაკავშირებით ანგარიშგების მოთხოვნები მთელი შავი ზღვის აკვატორიაზე გააფართოვა. რუსეთისა და უკრაინის სანაპირო წყლები ისედაც შედიოდა ამ ჩამონათვალში“, - განაცხადა Lloyd's Market Association-ის საზღვაო და საავიაციო მიმართულების ხელმძღვანელმა და JWC-ის მდივანმა ნილ რობერტსმა.

მისი თქმით, მეზობელი ქვეყნების ტერიტორიულ წყლებში განხორციელებული საზღვაო გადაზიდვებისთვის შეტყობინების წარდგენა კვლავ არ არის საჭირო.

საომარი რისკების დაზღვევის პრემიები ბოლო კვირებში მკვეთრად გაიზარდა, რადგან ბოლო პერიოდში შავ ზღვაში ათობით გემზე თავდასხმა განხორციელდა.