Reuters: ნატოს მოკავშირეებმა რუსეთის მიერ წყალქვეშა კაბელების საბოტაჟისთვის მზადება ჩაშალეს

არქტიკის წყლებში, შორეულ სვალბარდის არქიპელაგთან ნატოს მოკავშირეებმა მიმდინარე წლის გაზაფხულზე რუსული წყალქვეშა ნავების წვრთნა აღმოაჩინეს. დასავლელი ოფიციალური პირების ცნობით, რუსეთი საიდუმლო იარაღის გამოყენებას ამუშავებდა, რომლის მიზანიც წყალქვეშა კრიტიკული კაბელების კვალის დატოვების გარეშე მწყობრიდან გამოყვანაა, იუწყება Reuters-ი.

რუსეთის საიდუმლო ოპერაციას, რომლის შესახებაც Reuters-ს ორმა დასავლელმა ოფიციალურმა პირმა განუცხადა, მოსკოვის წყალქვეშა ომის სამმართველო GUGI ახორციელებდა. უწყება ღრმაწყლოვან წყალქვეშა აპარატებს იყენებდა დახვეწილი და დიდი დამაზიანებელი შესაძლებლობების მქონე ტექნოლოგიის გამოყენების სიმულაციისთვის.

ორი ოფიციალური პირის განცხადებით, რომლებიც ანონიმურობის პირობით საუბრობდნენ, ბრიტანეთის, ნორვეგიისა და აშშ-ის ერთობლივმა ოპერაციამ რუსულ ხომალდებს ზღვაში მიადევნა თვალყური და მათ მოქმედებას დაუპირისპირდა. რუსულმა ხომალდებმა წვრთნის დასრულება ვერ შეძლეს და ტერიტორია დატოვეს.

ბრიტანეთმა და ნორვეგიამ აპრილში განაცხადეს, რომ არქტიკის წყლებში რუსეთის საიდუმლო ოპერაცია აღმოაჩინეს. თუმცა ახალი იარაღის აღმოჩენის, ოპერაციის ზუსტი ადგილმდებარეობისა და მასში აშშ-ის მონაწილეობის შესახებ აქამდე ინფორმაცია არ გავრცელებულა.

წყლის ქვეშ დაპირისპირება იმ ფონზე მოხდა, როდესაც დასავლეთის ზოგიერთი სადაზვერვო უწყების წარმომადგენელი შიშობს, რომ კრემლი ევროპაში დივერსიული ოპერაციების მასშტაბებს ზრდის და ნატოსთან შესაძლო კონფლიქტისთვის ემზადება, წერს სააგენტო.

სამი ამერიკელი ოფიციალური პირის განცხადებით, აშშ-ის დაზვერვის ზოგიერთი ანალიტიკოსი სულ უფრო მეტად შეშფოთებულია, რომ რუსეთმა შესაძლოა ნატოს კოლექტიური თავდაცვის მექანიზმის, ე.წ. მე-5 მუხლის გამოცდა სცადოს.

დასავლელი ოფიციალური პირების შეფასებით, ასეთ შემთხვევაში წყალქვეშა კაბელების განადგურება რუსეთის მოქმედებების მნიშვნელოვანი ნაწილი შეიძლება გახდეს.

სვალბარდსა და ნორვეგიის კონტინენტურ ნაწილს ორი, თითოეული 1 400 კილომეტრის სიგრძის, წყალქვეშა ოპტიკურ-ბოჭკოვანი კაბელი აკავშირებს. ისინი ზღვის ზედაპირიდან 2 700 მეტრის სიღრმემდე გადის და სვალბარდის სატელიტურ სახმელეთო სადგურზე მიღებული სატელიტური მონაცემების უზარმაზარ მოცულობას გადასცემს.