Reuters: უნგრეთმა ფილიპინების, სომხეთისა და საქართველოს მოქალაქეებისთვის დღეიდან სამუშაო ვიზების გაცემა შეაჩერა

უნგრეთის მთავრობა დღეიდან ფილიპინების, საქართველოსა და სომხეთის მოქალაქეებისთვის სამუშაო ვიზების გაცემას წყვეტს. ინფორმაციას Reuters-ი ავრცელებს.

უნგრეთის ხელისუფლების განმარტებით, ეს ნაბიჯი უცხოელი მუშახელის ნაკადის დარეგულირებისკენ მიმართული პირველი ეტაპია.

უნგრეთის პრემიერ-მინისტრის პეტერ მადიარის პარტია „ტისა“-ში აცხადებენ, რომ ივნისიდან ბუდაპეშტი ევროკავშირის ფარგლებს გარეთ მცხოვრები მოქალაქეებისთვის სამუშაო ვიზების გაცემას მთლიანად შეაჩერებს.

მთავრობის პრესსპიკერის ვანდა სონდის თქმით, ხელისუფლება უცხოელი ადამიანების დასაქმების პირობების გამკაცრებას გეგმავს, რადგან მიაჩნია, რომ მათი მზარდი რაოდენობა ადგილობრივ შრომით ბაზარზე ხელფასებს ამცირებს.

ოფიციალური სტატისტიკის მიხედვით, უცხოელები უნგრეთის სამუშაო ძალის მხოლოდ 2%-ს შეადგენენ, თუმცა გარკვეული სექტორები, მათ შორის მომსახურებისა და წარმოების სფეროები, მათზე მნიშვნელოვნად არის დამოკიდებული.

ახალი გადაწყვეტილების თანახმად, პარასკევიდან შეიცვლება ის რეგულაციაც, რომელიც დასაქმების სააგენტოებს ფილიპინებიდან, საქართველოდან და სომხეთიდან თანამშრომლების გამარტივებული წესით დასაქმების შესაძლებლობას აძლევდა.

ქვეყანაში უკვე მყოფ უცხოელ დასაქმებულებს ვიზის ან ნებართვის ვადის გაგრძელებაზე განაცხადის შეტანა კვლავ შეეძლებათ, ხოლო უკვე წარდგენილი განაცხადები არსებული წესით განიხილება.

მთავრობა აღნიშნულ ცვლილებებს გრძელვადიანი რეფორმის პირველ ეტაპად აფასებს.

ამასთან, უნგრეთში მოქმედი ზოგიერთი უმსხვილესი უცხელი ინვესტორი გაფრთხილებას გამოთქვამს, რომ უცხოელი მუშაკების შემოსვლის სრულმა შეჩერებამ, შესაძლოა, უარყოფითი გავლენა მოახდინოს როგორც კომპანიების საქმიანობაზე, ისე ქვეყნის ეკონომიკაზე.