რევაზ კარანაძე: მიუხედავად იმისა, რომ ჩვენს გარშემო არსებობს რისკები, ჩვენ ვთამაშობთ ძალიან პრაგმატულად, ძალიან გონივრულად და ეს პრაგმატული და გონივრული საგარეო პოლიტიკა გვაძლევს საშუალებას, ამ მოცემულობაში სარგებელიც მივიღოთ

პოლიტეკონომისტმა რევაზ კარანაძემ გადაცემაში „დღის ქრონიკა“ გლობალურ კონტექსტში საქართველოს როლსა და ქვეყნის მულტივექტორული პოლიტიკის მნიშვნელობაზე ისაუბრა.

მან აღნიშნა, რომ საქართველოს ჩრდილოეთითა და სამხრეთით მიმდინარე კონფლიქტების ფონზე საქართველო და კავკასია დარჩა იმ შუა დერეფნად, რომელიც აზიას და ევროპას ერთმანეთთან დასაკავშირებლად სჭირდება.

„მიუხედავად იმისა, რომ ჩვენს გარშემო არსებობს რისკები, ჩვენ ვთამაშობთ ძალიან პრაგმატულად, ძალიან გონივრულად და ეს პრაგმატული და გონივრული საგარეო პოლიტიკა გვაძლევს საშუალებას, ამ მოცემულობაში სარგებელიც მივიღოთ. გამოჩნდა, რომ საჭიროა, რომ საქართველო და კავკასია იყოს ერთადერთი დამაკავშირებელი გზა ჩინეთის სახალხო რესპუბლიკასა და ევროკავშირს შორის, რომლებიც ბოლო რამდენიმე წლის განმავლობაში ცდილობენ, თავიანთი ეკონომიკური პოლიტიკა რაც შეიძლება, მჭიდროდ დაუკავშირონ ერთმანეთს და ვაჭრობა გააღრმაონ.

რაც უფრო მეტად ვიქნებით ჩართული აღმოსავლეთისა და დასავლეთის ერთმანეთთან კავშირში, მით უფრო აიწევს ჩვენი უსაფრთხოების დონეც, რადგან მათ ინტერესებში არ შევა, რომ ჩაკეტონ ერთადერთი გზა, რომელიც იქნება უსაფრთხო“, - განაცხადა რევაზ კარანაძემ.