რევაზ კარანაძე: ოპოზიცია ცდილობს ვიზალიბერალიზაციის საკითხი გამოიყენოს იმისთვის, რომ ხალხი ქუჩაში გამოვიდეს, რაზეც ეჭვი მეპარება, რომ ასე მოხდეს
ოპოზიცია ცდილობს ვიზალიბერალიზაციის საკითხი გამოიყენოს იმისთვის, რომ ხალხი ქუჩაში გამოვიდეს, რაზეც ეჭვი მეპარება, რომ ასე მოხდეს, - განაცხადა პოლიტეკონომისტმა რევაზ კარანაძემ გადაცემაში „დღის ქრონიკა“.
მისი თქმით, ოპოზიცია ვერ ხვდება, რომ თუ საქართველოს ვიზალიბერალიზაციას გაუუქმებენ, მაშინ ევროპა უფრო მეტად დაკარგავს საქართველოს, ვიდრე პირიქით.
„ოპოზიციის ნაწილი ცდილობს ხალხი დააშანტაჟოს, თითქოს არსებობს საფრთხე იმისა, რომ საქართველოს გაუუქმონ ვიზალიბერალიზაცია, თუმცა, ვერ ხვდებიან, რომ ამით თვითონ ევროპა უფრო მეტად დაკარგავს საქართველოს, ვიდრე პირიქით. ეს არის ერთადერთი თემა, რომელიც შემორჩა ამ „ნაციონალური მოძრაობის" სხვადასხვა ანასხლეტებს, რომლებიც დღეს ე.წ. მედასავლეთე ოპოზიციად გვევლინებიან. ისინი ცდილობენ, რომ ეს ერთადერთი დარჩენილი თემა სათავისოდ გამოიყენონ და რამენაირად ააგორონ ის ტალღა, რომ ხალხი როგორმე ქუჩაში გამოვიდეს ამ თემაზე, რაზეც ეჭვი მეპარება, რომ ასე მოხდეს“,- აღნიშნა კარანაძემ.
მისი თქმით, არ არსებობს არანაირი სამართლებრივი საფუძველი საქართველოსთვის ვიზალიბერალიზაციის გასაუქმებლად, გარდა იმისა, რომ საქართველო რაღაც ნაწილებში უბრალოდ არ ეთანხმება ევრობიუროკრატიას.
„მე ვფიქრობ, რომ რაციონალურობისა და ლოგიკურობის თემა არის ძალიან შორს ევროკავშირისგან დღევანდელ დღეს. თუ არსებობს რაღაც სტანდარტები, ამას საქართველო აკმაყოფილებს, თუმცა ეს სტანდარტებიც იცვლება ხოლმე", - განაცხადა კარანაძემ.
