რომის პაპი: ეკლესიის პასუხისმგებლობაა ლიდერებისთვის, მათ შორის რუსეთის, უკრაინისა თუ სხვა ქვეყნების მმართველებისთვის, მუდმივი მოწოდება, რომ დასხდნენ, აწარმოონ დიალოგი და იპოვონ პრობლემების გადაჭრის გზები ამ უკვე ყოველგვარ აზრს მოკლებული ომების გაგრძელების გარეშე

რომის პაპმა ევროპაში მიმდინარე კონფლიქტზე, განიარაღების აუცილებლობასა და მშვიდობიანი მოლაპარაკებების მნიშვნელობაზე ისაუბრა.

ჟურნალისტის შეკითხვაზე, თუ როგორ არის შესაძლებელი დიალოგი სახელმწიფოსთან, რომელიც აგრესორს წარმოადგენს, ბომბავს და ემუქრება არა მხოლოდ უკრაინას, არამედ ევროპის სხვა ქვეყნებსაც, პონტიფიკოსმა ხაზი გაუსვა ეკლესიის სოციალური მოძღვრების ფუნდამენტურ პრინციპებს.

„პირველ რიგში, სოციალური მოძღვრების პრინციპები არაძალადობას, სამართლიანობასა და განიარაღებას უწყობს ხელს - განსაკუთრებით დღევანდელ მსოფლიოში არსებული იმ საფრთხეების ფონზე, რომლებიც ზოგიერთი ქვეყნის ლიდერებისგან მოდის, როცა ისინი კვლავ იწყებენ საუბარს ბირთვულ იარაღსა და სულ უფრო დამანგრეველ ომებზე“, - აღნიშნა მან.

მისი თქმით, „შეიარაღების გაგრძელება და იმ საშინელ სამხედრო ინდუსტრიაში რესურსების დაბანდება, რომელიც ომის გაღვივებით უკვე დიდი ხანია უზომოდ ამდიდრებს რამდენიმე რჩეულს - მაშინ, როდესაც ამ მილიარდობით ევროთი თუ დოლარით შესაძლებელი იყო მსოფლიოში შიმშილის, უსახლკარობისა და უმუშევრობის პრობლემების მოგვარება“.

„აუცილებელია ისეთი ხმა, რომელიც ეცდება ადამიანის ღირსების, სიცოცხლის ფასის და იმის გაცნობიერებას, რომ უმჯობესია მეტი დაიხარჯოს ჯანდაცვასა და განათლებაზე, ვიდრე იარაღზე. მჯერა, ეკლესიის პასუხისმგებლობაა ამ ღირებულებების პოპულარიზაცია და ლიდერებისთვის - მათ შორის რუსეთის, უკრაინისა თუ სხვა ქვეყნების მმართველებისთვის - მუდმივი მოწოდება, რომ დასხდნენ, აწარმოონ დიალოგი და იპოვონ პრობლემების გადაჭრის გზები ამ უკვე ყოველგვარ აზრს მოკლებული ომების გაგრძელების გარეშე“, - დასძინა მან.