რუმინეთმა დრონებთან დაკავშირებული ინციდენტების გამო რუსი დიპლომატი გააძევა
რუმინეთში რუსეთის ელჩი საგარეო საქმეთა სამინისტროში დაიბარეს, სადაც საპროტესტო ნოტა და რუსეთის დიპლომატიური მისიის ერთ-ერთი თანამშრომლის გაძევების შესახებ გადაწყვეტილება გადასცეს. გარდა ამისა, ბუქარესტმა კონსულტაციებისთვის რუსეთში თავისი ელჩი გაიწვია.
ამის მიზეზი მანამდე რუმინეთის საჰაერო სივრცის უპილოტო საფრენი აპარატების მიერ განხორციელებული დარღვევები გახდა. ბუქარესტში აღნიშნავენ, რომ ეს რუსული დრონები იყო. „ასეთი შემთხვევები „სრულიად დაუშვებელი და მიუღებელია“, - განაცხადეს რუმინეთის საგარეო საქმეთა სამინისტროში და ხაზი გაუსვეს, რომ ქვეყნის საჰაერო სივრცე ასევე ევროკავშირისა და ნატოს საჰაერო სივრცეა.
„რუსეთის ფედერაციას ეკისრება სრული პასუხისმგებლობა ყველა ამ სერიოზულ ინციდენტსა და რეგიონში უსაფრთხოების სიტუაციის გაუარესებაზე“, - ნათქვამია უწყების განცხადებაში.
24-დან 26 ივლისამდე რუმინეთის შეიარაღებულმა ძალებმა სამი უპილოტო საფრენი აპარატი ჩამოაგდეს, რომლებმაც ქვეყნის საჰაერო სივრცე დაარღვიეს. ყველა ეს შემთხვევა უკრაინაზე რუსეთის მასშტაბური თავდასხმების დროს მოხდა.
იმედი
წყარო: imedinews.ge