რუმინეთმა საზღვართან დრონების გამო ჰაერში გამანადგურებლები აწია

უკრაინა-რუმინეთის საზღვართან უპილოტო საფრენი აპარატების გამოჩენის გამო, რუმინეთმა სამხედრო გამანადგურებლები ჰაერში აწია. ქვეყნის თავდაცვის სამინისტროში აცხადებენ, რომ რადიოლოკაციურმა სისტემამ დააფიქსირა საჰაერო სამიზნეების ჯგუფი, რომელიც უკრაინის ტერიტორიაზე, დასახლებულ პუნქტ კილია-ვეკეს ჩრდილოეთით, რუმინეთის საზღვრის სიახლოვეს გადაადგილდებოდა.

„ვითარების მონიტორინგისთვის 57-ე ავიაბაზიდან აფრინდა ესპანეთის სამხედრო-საჰაერო ძალების ორი F-18 ტიპის გამანადგურებელი, რომლებიც ნატოს გაძლიერებული საჰაერო პატრულირების ფარგლებში საბრძოლო მორიგეობაზე იმყოფებიან“, - ნათქვამია უწყების განცხადებაში.

საჰაერო განგაში 05:44 საათზე გაუქმდა. ქვეყნის საჰაერო სივრცის დარღვევის შესახებ ინფორმაცია არ გავრცელებულა.

24 სექტემბრის ღამეს რუსეთმა უკრაინის ტერიტორიაზე მორიგი მასშტაბური იერიში მიიტანა. კერძოდ, ოკუპანტებმა კიევზე ბალისტიკური რაკეტებით განახორციელეს დარტყმა, რის შედეგადაც ორი ადამიანი დაიღუპა, რვა კი დაშავდა. უკრაინულ რეგიონებზე რუსული თავდასხმის გამო გამანადგურებლები ჰაერში პოლონეთმაც აწია.