რუსეთის მოქალაქე ანდრეი კოზლოვი საჯარო სივრცეში შეურაცხმყოფელი სიტყვების გამოყენებისთვის მოსამართლემ 3000 ლარით დააჯარიმა, ის საქართველოდან სამი წლის ვადით არის გაძევებული

თბილისის საქალაქო სასამართლომ რუსეთის მოქალაქე ანდრეი კოზლოვის საქმე განიხილა. საჯარო სივრცეში შეურაცხმყოფელი სიტყვების გამოყენებისთვის ის მოსამართლემ სამართალდამრღვევად ცნო და 3000 ლარით დააჯარიმა.

რუსეთის მოქალაქე საქართველოდან სამი წლის ვადით არის გაძევებული.

„აღნიშნულმა პიროვნებამ მის პირად გვერდზე განათავსა ვიდეოები, სადაც ჰყვებოდა საქართველოში ცხოვრების გამოცდილებასთან დაკავშირებით. მისი მხრიდან გაჟღერებული ფრაზები და ტერმინები მიემართებოდა ქართველ ერს, მოსახლეობას. თითოეული ფრაზა ემსახურებოდა მხოლოდ და მხოლოდ შეურაცხყოფას და არ ჰქონდა რაიმე სხვა სახის დატვირთვა. წერილობით დოკუმენტაციაში, ისევე როგორც ვიდეოჩანაწერში სრულად იყო ასახული ის ფრაზები და ტერმინოლოგია, რასაც ის ქართველი ხალხის მისამართით იყენებდა. მის მიმართ მოთხოვნა იყო ჯარიმა და ასევე ქვეყნიდან 3 წლის ვადით გაძევება, რომელიც დღეს სასამართლომ დააკმაყოფილა“, - განაცხადა შსს-ს იურიდიული დეპარტამენტის წარმომადგენელმა სალომე ქირიამ.