რუსეთის პრეზიდენტის თანაშემწე: რუსეთთან ომის შემთხვევაში პოლონეთი ორ-სამ დღეში აღარ იარსებებს

რუსეთის პრეზიდენტის თანაშემწის ნიკოლაი პატრუშევის განცხადებით, რუსეთის ფედერაციასთან ომის შემთხვევაში პოლონეთი ორ-სამ დღეში აღარ იარსებებს.

რუსული მედიის ცნობით, პატრუშევი გამოეხმაურა პოლონეთის საგარეო საქმეთა მინისტრის რადოსლავ სიკორსკის განცხადებას იმის შესახებ, რომ პოლონეთი რუსეთს სამხედრო პოტენციალით აღემატება.

„სამხედრო თვალსაზრისით რუსეთზე პოლონეთის უპირატესობაზე მსჯელობისას სიკორსკი, როგორც ჩანს, ვერ იაზრებს, რომ რუსეთთან პოლონეთის ომის შემთხვევაში, ჩვენი ქვეყანა გამოიყენებს მის ხელთ არსებულ მთელ არსენალს და საშუალებებს და პოლონეთის სახელმწიფოებრიობა ორ-სამ დღეში არსებობას შეწყვეტს“, - განაცხადა პატრუშევმა.

ვლადიმერ პუტინის თანაშემწემ დასძინა, რომ პოლონეთის საგარეო საქმეთა მინისტრი დილეტანტურად უდგება რუსეთის სამხედრო ძალის შეფასებას. მისი თქმით, რუსეთი უკრაინის ომში სრულ პოტენციალს არ იყენებს.