რუსლან სტეფანჩუკი: ევროკავშირისკენ ჩვენი გზა სერიოზულ საფუძველს წარმოადგენს ჩვენი შემდგომი თანამშრომლობისთვის. ჩვენ კონკურენტები კი არა, პარტნიორები ვართ ამ გზაზე

უკრაინის პარლამენტის სპიკერმა რუსლან სტეფანჩუკმა სერბეთში გამართული ​​ევროკავშირის წევრობის კანდიდატი ქვეყნების პარლამენტების თავმჯდომარეთა საინაუგურაციო კონფერენცია წარმატებულად შეაფასა. რუსლან სტეფანჩუკმა აღნიშნა, რომ კანდიდატი ქვეყნები არა ერთმანეთის კონკურენტები, არამედ პარტნიორები არიან.

„აქედან რამდენიმე მნიშვნელოვანი გზავნილით მივდივარ. პირველი გზავნილი ის არის, რომ ჩვენი შეხვედრა წარმატებული იყო. ევროკავშირისკენ ჩვენი გზა სერიოზულ საფუძველს წარმოადგენს ჩვენი შემდგომი თანამშრომლობისთვის. ჩვენ კონკურენტები კი არა, პარტნიორები ვართ ამ გზაზე. ჩვენ უნდა გავუზიაროთ ერთმანეთს წარმატებები, უნდა გავუზიაროთ შეცდომები, უნდა გავუზიაროთ ჩვენი თანამშრომლობის შედეგები, რადგან ყველას ერთი გზა გვაქვს - ევროკავშირისკენ მიმავალი გზა. მეორე გზავნილი, რომელზეც დღეს ჩვენს კოლეგებთან ერთად ვისაუბრეთ, ჩვენი ქვეყნების თანამშრომლობას ეხება“, - აღნიშნა სტეფანჩუკმა.

საქართველოს პარლამენტი ბელგრადის დეკლარაციას მიუერთდა, რომელიც სერბეთის რესპუბლიკაში გამართული ევროკავშირის წევრობის კანდიდატი ქვეყნების პარლამენტების თავმჯდომარეთა საინაუგურაციო კონფერენციის ფარგლებში მიიღეს.