რუსთავში რაგბის ბავშვთა აკადემია ,,რუსთაველი“ გაიხსნება
რუსთავში, რაგბის ბავშვთა აკადემია ,,რუსთაველი“ უახლოეს პერიოდში გაიხსნება. ინფორმაციას რუსთავის მერიის პრესსამსახური ავრცელებს.
რუსთავის მერიამ ნიკო ლომოურის ქუჩაზე, სადაც მორაგბეთა პირველი თაობა ვარჯიშობდა, ახალი სტადიონის და აკადემიის მშენებლობა თითქმის დაასრულა. რაგბის აკადემიის მშენებლობის დასრულებამდე ცნობილი რუსთაველი მორაგბეებით დაკომპლექტებული სამწვრთნელო შტაბი კვალიფიკაციას საფრანგეთში, ნიცის სარაგბო აკადემიაში აიმაღლებს და ევროპის წამყვანი კლუბების გამოცდილებას გაიზიარებს.
„რუსთავში, ისტორიულ სარაგბო ადგილზე ახალი აკადემიის მშენებლობა ძალიან მალე დასრულდება. „რუსთაველის“ სამწვრთნელო შტაბი და მენეჯმენტი საფრანგეთის ქალაქ ნიცის სარაგბო აკადემიაში ვართ მიწვეული. ვეცდებით მაქსიმალურად ავიმაღლოთ კვალიფიკაცია, მეტი სიახლე ჩამოვიტანოთ იმისათვის, რომ მაღალი სტანდარტებით ვიმუშაოთ“, - განაცხადა რაგბის ბავშვთა აკადემია „რუსთაველის" მთავარმა მწვრთნელმა ირაკლი ნატრიაშვილმა.
რუსთავის რაგბის აკადემიაში 5-დან 14 წლამდე მოზარდების ონლაინრეგისტრაცია უკვე დაწყებულია. ახალი სპორტული ადგილი რუსთავში ოქტომბერში გაიხსნება და რაგბის ყველა მოყვარულისთვის ხელმისაწვდომი იქნება.
სოციალურად დაუცველი ოჯახების ბავშვების აკადემიაში სწავლას რუსთავის მერია სპეციალური სტიპენდიით დააფინანსებს.
იმედი
წყარო: imedinews.ge