სალომე ლომიძე: მიზანმა გაამართლა - წარმატებით გავიარე სტაჟირების სახელმწიფო პროგრამა და ამჟამად დასაქმებული ვარ ეკონომიკისა და მდგრადი განვითარების სამინისტროს ადამიანური რესურსების მართვის დეპარტამენტში
სტაჟირების სახელმწიფო პროგრამა საშუალებას მაძლევდა, რომ ის თეორიული ცოდნა, რაც უნივერსტიტეტში მივიღე, პრაქტიკაში განმეხორციელებინა, - განაცხადა ეკონომიკისა და მდგრადი განვითარების სამინისტროს ადამიანური რესურსების მართვის დეპარტამენტის თანამშრომელმა სალომე ლომიძემ.
როგორც სალომე ლომიძემ აღნიშნა, საჯარო სამსახურში საქმიანობით, კერძოდ კი, ანაზღაურებადი სტაჟირების სახელმწიფო პროგრამის გავლით პირველად საჯარო ადმინისტრირებისა და სახელმწიფო მმართველობის პროგრამის დამამთავრებელ კურსზე სწავლისას დაინტერესდა. სალომე ლომიძემ წარმატებით გაიარა პროგრამა და დღეს ეკონომიკისა და მდგრადი განვითარების სამინისტროს თანამშრომელია.
„მიზანმა გაამართლა - წარმატებით გავიარე აღნიშნული სტაჟირების პროგრამა, შემდგომ, იმ პერიოდში გამოცხადებულ კონკურსშიც მივიღე მონაწილეობა და ამჟამად დასაქმებული ვარ ეკონომიკისა და მდგრადი განვითარების სამინისტროს ადამიანური რესურსების მართვის დეპარტამენტში“, - აღნიშნა სალომე ლომიძემ.
მთავრობა პრემიერ-მინისტრის მიერ ინიცირებულ ანაზღაურებად სტაჟირებაზე მორიგი ნაკადის მისაღებად განაცხადების მიღებას მიმდინარე წლის პირველი სექტემბრიდან კიდევ ერთხელ გამოაცხადებს. პროგრამის გავლის საშუალება დაახლოებით 3 000 ახალგაზრდას ექნება.
იმედი
წყარო: imedinews.ge