სამედიცინო უნივერსიტეტის რექტორი სახელმწიფო უნივერსიტეტებში უფასო სწავლებაზე: ძალიან ბევრი ოჯახისთვის ეს არის ძალიან შეღავათიანი, ბევრისთვის საკმაოდ მძიმე ტვირთი იყო სახელმწიფო უნივერსიტეტებში სწავლის საფასურის გადახდა. მეორე მხრივ, ეს კარგი სწავლისკენ სტუდენტის წახალისებაა, ანუ ისწავლი კარგად - შემდგომ ეტაპზეც მიიღებ დაფინანსებას

თბილისის სახელმწიფო სამედიცინო უნივერსიტეტის რექტორი, პროფესორი ირაკლი ნატროშვილი სახელმწიფო უმაღლეს სასწავლებლებში უფასოდ სწავლის შესაძლებლობას აფასებს.

„ძალიან ბევრი ოჯახისთვის ეს არის ძალიან შეღავათიანი, რა თქმა უნდა, იმიტომ, რომ ბევრისთვის საკმაოდ მძიმე ტვირთი იყო თუნდაც, სახელმწიფო უნივერსიტეტებში სწავლის საფასურის გადახდა. მეორე მხრივ, ეს კარგი სწავლისკენ სტუდენტის წახალისებაა. ანუ ისწავლი კარგად - შემდგომ ეტაპზეც მიიღებ დაფინანსებას. ეს ძალიან მნიშვნელოვანია და არა მგონია, რომ ამაზე ვინმემ თქვას, რომ უსამართლოა. ეს ასეა მთელ მსოფლიოში, თუ მიიღებ დაფინანსებას, ეს არ ნიშნავს, რომ გაფინანსებენ თავიდან ბოლომდე, მთელი სწავლის პერიოდი და არ აქვს მნიშვნელობა, შეასრულებ იმ კრედიტებს თუ არ შეასრულებ, რა თქმა უნდა, ეს დამოკიდებულია სწავლის ხარისხზე და შესრულებული კრედიტების რაოდენობაზე“, - განაცხადა ირაკლი ნატროშვილმა.

სახელმწიფო უნივერსიტეტებში უფასოდ სწავლის შესაძლებლობა განათლების მინისტრმა განმარტა. გივი მიქანაძემ აღნიშნა, რომ პირველი ორი სემესტრის განმავლობაში სახელმწიფო უნივერსიტეტის ყველა სტუდენტი სრულად დაფინანსდება, თუმცა ამ ორი სემესტრის განმავლობაში მათ უნდა უზრუნველყონ, დადგენილი კრედიტების მინიმუმ 80%-ის მიღება, რომ მესამე სემესტრში 100%-იანი დაფინანსება შეინარჩუნონ. მისი თქმით, იმ შემთხვევაში, თუ სტუდენტი კრედიტების 80%-ს ვერ დააგროვებს, სახელმწიფო მაინც შემოდის თანადაფინანსებაში.