სამხრეთ აფრიკაში მომხდარი ორი მასობრივი სროლის შედეგად, სულ მცირე, 27 ადამიანი დაიღუპა

სამხრეთ აფრიკაში მომხდარი ორი მასობრივი სროლის შედეგად, სულ მცირე, 27 ადამიანი დაიღუპა, - იუწყება ადგილობრივი პოლიცია.

პოლიციის ცნობით, პირველი თავდასხმა შაბათს საღამოს, დაახლოებით 21:30 საათზე, იოჰანესბურგის დასავლეთით მდებარე ერთ-ერთ ბარში მოხდა. შეიარაღებულმა პირებმა ცეცხლი ჯერ შენობის გარეთ მყოფ ხალხს გაუხსნეს, შემდეგ კი შიგნით შევიდნენ და სროლა განაგრძეს.

თავდამსხმელებმა, რომლებიც AK-47 ტიპის ავტომატებითა და პისტოლეტებით იყვნენ შეიარაღებულნი, ზოგ სტუმარს მობილური ტელეფონებიც წაართვეს და შემთხვევის ადგილიდან ორი უცნობი ავტომობილით მიიმალნენ. ინციდენტის დროს მათ ასევე ცეცხლი წაუკიდეს ორ ავტომანქანას. ბარში მომხდარ სროლას 13 მამაკაცი და 4 ქალი ემსხვერპლა.

მეორე ტრაგედია კვირას, ადრე დილით, კეიპტაუნის მახლობლად, ლვანდლეში დაფიქსირდა. შეიარაღებული პირები შეიჭრნენ გასართობ დაწესებულებაში და სტუმრებს ცეცხლი გაუხსნეს. ადგილზე 5 ადამიანი დაიღუპა, ხოლო კიდევ 5 საავადმყოფოში გადაყვანის შემდეგ გარდაიცვალა.

სამართალდამცველებმა ორივე ფაქტზე გამოძიება დაიწყეს. დამნაშავეების დასაკავებლად მობილიზებულია სპეცდანაყოფები, თუმცა ამ ეტაპზე დაკავებული არავინაა.