საქართველო იუნესკოს მსოფლიო მემკვიდრეობის კომიტეტის 48-ე სესიაში მონაწილეობს
კორეის რესპუბლიკის ქალაქ ბუსანში იუნესკოს მსოფლიო მემკვიდრეობის კომიტეტის 48-ე სესია მიმდინარეობს. სესიაში მონაწილეობს საქართველოს კულტურის სამინისტროს კულტურული მემკვიდრეობის დეპარტამენტის უფროსი სალომე ჯამბურია.
საქართველოს სახელით სიტყვით გამოსვლის დროს, სალომე ჯამბურიამ მადლობა გადაუხადა მსოფლიო მემკვიდრეობის კომიტეტს, იუნესკოს მსოფლიო მემკვიდრეობის ცენტრს, ICOMOS-სა და ICCROM-ს საქართველოსთან მრავალწლიანი თანამშრომლობისა და მხარდაჭერისთვის.
სესიის ფარგლებში კომიტეტმა მსოფლიო მემკვიდრეობის ნუსხაში შეტანილი „მცხეთის ისტორიული ძეგლების“ კონსერვაციის მდგომარეობა განიხილა. მომზადდა შესაბამისი რეკომენდაციები.
საქართველო მიესალმება კომიტეტის მიერ მიღებულ გადაწყვეტილებას, სრულად იზიარებს შემოთავაზებულ რეკომენდაციებს და მზად არის მათი ეფექტიანი განხორციელებისთვის მცხეთის ისტორიული ძეგლების გამორჩეული ზოგადსაკაცობრიო ღირებულების გრძელვადიანი დაცვისა და მდგრადი მართვის უზრუნველსაყოფად.
ინფორმაციას კულტურის სამინისტრო ავრცელებს.
იმედი
წყარო: imedinews.ge