საქართველოს ინოვაციების და ტექნოლოგიების სააგენტოს ორგანიზებით, თელავის ტექნოპარკში ინოვაციური პროტოტიპების კონკურსი „Smart Stay“ გაიმართება

26-27 სექტემბერს, საქართველოს ინოვაციების და ტექნოლოგიების სააგენტოს (GITA) ორგანიზებით, თელავის ტექნოპარკში ჰაკათონი სახელწოდებით „Smart Stay“ მესამედ ჩატარდება. ინფორმაციას GITA ავრცელებს.

პროექტის მთავარი მიზანია სასტუმრო ინდუსტრიაში არსებული გამოწვევების საპასუხოდ თანამედროვე ტექნოლოგიური გადაწყვეტებისა და პროტოტიპების შექმნა, რაც ხელს შეუწყობს სექტორის ციფრულ ტრანსფორმაციასა და ქვეყანაში ინოვაციური მეწარმეობის განვითარებას.

ჰაკათონში ჩართვა შეუძლია 16 წლიდან ნებისმიერ დაინტერესებულ პირს, როგორც ინდივიდუალურად, ისე 2-4 წევრიანი გუნდის შემადგენლობით. პროექტში მონაწილეობა დეველოპერებს, დიზაინერებს, მარკეტერებს, ინჟინრებს, სტუდენტებს, ასევე ტურიზმისა თუ სტუმარმასპინძლობის სფეროს წარმომადგენლებს შეუძლიათ.

36-საათიანი ინტენსიური სამუშაო პროცესის განმავლობაში მონაწილე გუნდები თელავის ტექნოპარკის მაღალტექნოლოგიური ლაბორატორიით ისარგებლებენ და პროექტებზე ინდუსტრიის წამყვანი მენტორების მხარდაჭერით იმუშავებენ.

ღონისძიების დასკვნით ეტაპზე კომპეტენტური ჟიური გამარჯვებულ გუნდს გამოავლენს, რომელსაც პროტოტიპის შემდგომი განვითარებისა და კომერციალიზაციისთვის 10,000 ლარის ოდენობის გრანტი გადაეცემა.

პარტნიორი კომპანიები ჰაკათონზე საკუთარ რჩეულ გუნდებს გამოავლენენ, სპეციალურ პრიზებს დააწესებენ და მონაწილეებს სამომავლო თანამშრომლობასა თუ პროდუქტების პრაქტიკულ ტესტირებას შესთავაზებენ.

რეგისტრაცია შესაძლებელია შემდეგ ბმულზე, 2026 წლის 20 სექტემბრის ჩათვლით.