საქართველოს სასაზღვრო პოლიციის სანაპირო დაცვის დეპარტამენტის წარმომადგენლები ნატოს საზღვაო უსაფრთხოების ოპერაციაში „ზღვის მცველი“ მონაწილეობის მისაღებად გაემგზავრნენ
საქართველოს სასაზღვრო პოლიციის სანაპირო დაცვის დეპარტამენტის კანონაღსრულების ტაქტიკური ჯგუფის წევრები ივლისში ნატოს საზღვაო უსაფრთხოების ოპერაციაში „ზღვის მცველი“ (Operation SEA GUARDIAN) უკვე მეხუთედ მიიღებენ მონაწილეობას. ინფორმაციას სასაზღვრო პოლიცია ავრცელებს.
საბერძნეთში გამგზავრებამდე ჯგუფის წევრებს საქართველოს სასაზღვრო პოლიციის უფროსის მოადგილე, დავით ბიწკინაშვილი, შეხვდა. დავით ბიწკინაშვილმა საზღვაო ოპერაციაში საქართველოს მონაწილეობის მნიშვნელობაზე ისაუბრა, სანაპირო დაცვის დეპარტამენტის წარმომადგენლებს წარმატებები უსურვა და ხაზი გაუსვა საერთაშორისო ოპერაციაში ქვეყნის ღირსეულად წარმოჩენის მნიშვნელობას.
„ზღვის მცველი“ ნატოს ეგიდით მიმდინარე და ამჟამად ერთადერთი საზღვაო უსაფრთხოების ოპერაციაა, რომლის მიზანია ტერორიზმთან ბრძოლა, თავისუფალი ნაოსნობის მხარდაჭერა, საზღვაო უსაფრთხოების შესაძლებლობების გაძლიერება, უკანონო ეკონომიკური საქმიანობის აღკვეთა და საზღვაო ვითარების შესახებ ცნობიერების ამაღლება.
შეხვედრას ასევე ესწრებოდნენ სასაზღვრო პოლიციის ადმინისტრაციის უფროსი თათია სულაქველიძე, ადმინისტრაციის უფროსის მოადგილე თამთა დანელია და საერთაშორისო ურთიერთობების სამმართველოს უფროსი რამაზ პაპიძე.
